Chikulupi Chisyesyene Mpaka Chitukamuchisye Kuŵa Ŵakusangalala Mpaka Kalakala

Malemba Geswela gakusasala kuti, “Mundu jwele jwali jwakulungama pameso pa Mlungu tachilama kupitila mu chikulupi.” (Aloma 1:17) Maloŵe ga palilembali gali gakulimbikasya ligongo gakulosya kuti wawojo akwete sogolo jambone. Mwamtuli?

Paŵamalisisye masengo gakwe pachilambo chapasi, Yesu jwali Mesiya ŵawujile kwinani kukutama ni Mlungu. Ŵakulijiganya ŵakwe paŵamlolaga ali mkwawula, “Yesu ŵajigalidwe kwawula kwinani jimanjajo alikumlola. Nipo liwunde lyamwunichile ni nganawoneka soni.” (Masengo 1:9) Paŵaliji kwinani, Mlungu ŵamsagwile kuŵa Mwenye jamachili jakwinani. Msogolo muno pachangaŵapa, Yesu, “Mwanache jwa mundu” chachiyika ‘mlumbili lwakwe pampepe ni malayika gosope, tachitama pa chitengu chakwe cha Uchimwene. Tachasonganya ŵandu ŵa ngosyo syosope pameso pakwe, nipo tachalekanganya mpela mwele jwakuchinga mwakusalekanganichisya ngondolo ni mbusi.’ (Mateyu 25:31, 32) Ana yeleyi yichitendekwa chakachi?

Malemba Geswela gaŵechete mkanipaŵe ya ndaŵi ja yipwetesi pachilambo chosope yachiyiŵa chimanyilo chakuti Mesiya asigele panandi kwajelusya ŵandu. Yesu ŵasasile yakwamba chimanyilo kuti: “Mitundu ja ŵandu jakulekanganalekangana tijichimenyana ngondo, chilambo tichichijimuchilana ni chilambo chine, soni uchimwene tiwuchimenyana Uchimwene ujakwe. Tikuchiŵa kwana yisichinya, sala, ni yilwele ku malo gakulekanganalekangana. Tikuchiŵa soni kwana yakogoya.”—Luka 21:7, 10, 11.

Lelo jino tukuwona umboni wakuti maloŵe gaŵaŵechete Yesuga gakwanilichikwa. Pachangakaŵapa Yesu chachiyika kukonanga ŵakusakala. Pambesi pakwe nombe najo Satana chachimjonanga. Chilambo chosope chichiŵa paladaiso. Ŵandu chachitamaga mwamtendele jwine ni mjakwe, soni atamose ni yinyama yakwe. “Lisogo tilichitama pamo ni mwanache jwa ngondolo, chisuŵi tichichigona pasi pamo ni mwanache jwa mbusi, mwanache jwa ng’ombe ni mwanache jwa lisimba tachilya pamo, nipo mwanache jwamnono ni jutachiyichingaga yosopeyo. Tipachiŵa pangali soni chine chilichose chakupweteka kapena chakonanga.” (Yesaya 11:6, 9) “Pangali atamose jumo mchilambomo jutachiŵecheta kuti: ‘Une ngulwala.’ . . . Pelepo ŵandu ŵatatale meso tachipakombola kulola, nipo ŵangapikana tachipikana.” (Yesaya 33:24; 35:5) Atamose ŵawe chachijimuka. “Ambuje tachichimasya chiwa mpaka ndaŵi jangali mbesi. Tachipukuta misosi m’meso mwa jwalijose.” (Yesaya 25:8; Chiwunukuko 21:4) Yaŵasakaga Mlungu yakwamba chilambo chapasi yichitendekwa. Ana chelechi ngaŵa chembecheyo chambone?

Apitilisye Kukusya Chikulupi Chawo

Ana ni ŵandu ŵapi ŵele Mlungu chachapa mbote jeleji? Ŵakwete chikulupi chisyesyene!

Akumbuchileje kuti mundu akusakola chikulupi ligongo lyakumanyilila yisyesyene ya Maloŵe ga Mlungu. Myoyo, ajendelechele kummanyilila chenene Mlungu soni Yesu.

Mundu jwakwete chikulupi chisyesyene akusalosya masengo gakulungama. Maloŵe ga Mlungu gakusaŵecheta kuti: “Chikulupi changali yitendo chili chewe.” (Yakobo 2:26) Mwakutenda yambone, chachilosya ndamo syambone mnope sya Mlungu, mpela machili, chilungamo, lunda, soni chinonyelo. Apitilisye kulingalinga kola ndamo syambonesi.

Kola chikulupi chisyesyene kuchapa majali gamajinji. Yisyene, chikulupichi mpaka chakamuchisye kuŵa ni umi wakusangalala sambano jino, soni mpaka kalakala.