MBALI 8
Ayisalayeli Akwinjila mu Kanani
Yoswa akwalongolela Ayisalayeli pakusumula cilambo ca Kanani. Yehofa akwapa macili ŵakwelusya kuti ŵakulupusye ŵandu ŵakwe kwa acimmagongo
YILI yisigele yaka yejinji Ayisalayeli mkanajinjile m’cilambo ca Kanani, Yehofa ŵaŵecete kuti cilamboci cacicipeleka kwa yisukulu ya Abulahamu. Sambano Ayisalayeliŵa paŵaliji asigele panandi kwinjila m’Cilambo Cacilanga, Yoswa ni juŵaliji jwakwalongolela.
Mlungu ŵaweni ŵandu ŵa ku Kanani kuŵa ŵakuŵajilwa kwajonanga. Jemanjaji ŵasakesye cilamboco ni yitendo yakunyalaya yakugonana, soni kuwulagana kwatupile. Ni paligongo lyeleli, misinda ja Kanani jiŵasumwile Ayisalayeli jaŵajilwe kujijonanga josope.
Nambo mkanajinjile m’cilambomo, Yoswa ŵatumisye ŵakusonda ŵaŵili ŵaŵajile kwicila mu msinda wa Yeliko kwa jwamkongwe jwine lina lyakwe Lahabu. Jwamkongweju ŵapocele ŵakusondaŵa m’nyumba jakwe, soni ŵasisile, atamose kuti jwalakwe ŵamanyililaga kuti jemanjaji ŵaliji Ayisalayeli. Lahabu ŵakwete cikulupi mwa Mlungu jwa Ayisalayeli, ligongo ŵapikene yiŵatiga pakwakulupusya ŵandu ŵakwe. Jwalakwe ŵasalile ŵakusondawo kuti alumbile kuti cacimkulupusya pamo ni liŵasa lyakwe.
Kaneko Ayisalayeli paŵajinjile m’cilambo ca Kanani, ni kuŵandicila msinda wa Yeliko, Yehofa mwakusimonjesya ŵatendekasisye kuti yipupa ya msindawo yigwe. Asilikali ŵa Yoswa ŵawutucile mkatimo ni kuwujonanga msindawo, nambo ŵamkulupwisye Lahabu ni liŵasa lyakwe. Kaneko mu yaka yakwana msano ni cimo, Yoswa ŵaputile ngondo syejinji mpaka ŵasumwile mbali jekulungwa ja Cilambo Cacilangaco. Panyuma pakwe cilamboco ŵacigaŵenye kwa ngosyo sya Ayisalayeli.
Pambesi pakutumicila Mlungu yaka yejinji, Yoswa ŵasongangenye pamo ŵandu wosope. Ŵakumbwisye yiŵaŵele Yehofa mkwatendela acinangolo ŵawo, ni ŵalimbikasisye kuti amtumicileje Yehofa. Nambo paŵawile Yoswa yimpepe ni acakulungwa acimjakwe, Ayisalayeli ŵamlesile Yehofa ni kutanda kutumicila milungu jaunami. Kwa yaka yakwana 300, ŵanduŵa nganapikanilaga malamusi ga Yehofa mwakulupicika. Mu yaka yeleyi, Yehofa ŵakundaga kuti acimmagongo mpela Afilisiti ŵalagasyeje Ayisalayeli. Nambope Ayisalayeliŵa paŵam’ŵendaga Yehofa kuti ŵakamucisye, jwalakwe ŵasagulaga jwakwelusya kuti ŵakulupusyeje. Ŵakwelusyaŵa pamo ŵaliji ŵakwana 12.
Ndaŵi ja ŵakwelusya jatukujiŵalanga m’buku ja Oweruza, jatandite ni jwakwelusya lina lyakwe Otiniyeli, ni kumalisya ni jwakwelusya Samusoni juŵaliji jwamacili mnope mwakucilu kupunda mundu jwalijose. Buku ja m’Baibulo ja Oweruza jeleji, kwejinji jikulosya kuti: Kupikanila Yehofa kukusatupa upile, nambo ungapikanila ukusatendekasya yipwetesi.
—Nganiji jityocele m’mabuku ga Yoswa; Oweruza; Levitiko 18:24, 25.