Yampaka Atende Kuti Akole Liŵasa Lyakusangalala

Achalume Mwanonyeleje Achiŵamkwenu

“Achalume ŵanonyeleje achiŵamkwawo, mpela mwele mwakusayinonyelela yilu yawo. Jwele jwakusamnonyela jwamkongwe jwakwe ni kuti akusalinonyela jwalakwe msyene. Pakuti pangali mundu jwakuŵengana ni chilu chakwe, nambo akusachilisya ni kuchisamalila.”—AEFESO 5:28, 29.

Jwamlume ali mtwe wa liŵasa. (Aefeso 5:23) Jwamlume jwambone ngakusaŵa jwaukali soni ngakusagamba kwalamula ŵamkwakwe. Jwalakwe akusiŵanonyela ŵamkwakwe, akusiŵasamalila soni kwapa yakusosechela yapaumi. Ngakusagamba kutenda yindu yakulinonyelesya nambo akusatenda yindu yampaka yasangalasye ŵamkwakwe. (Afilipi 2:4) Jwamlume jwambone akusiŵapikanila ŵamkwakwe pakuŵecheta soni jwangatendelaga “ngalwe.”—Akolose 3:19.

Achakongwe Mwachimbichisyeje Achiŵamkwenu

“Jwamkongwe jwalijose amchimbichisyeje jwamlume jwakwe.”—AEFESO 5:33.

Mwiŵasa mukusaŵa mtendele naga ŵakongwe akusiŵachimbichisya soni kwakamuchisya ŵamkwawo. Jwamkongwe jwambone jwanganyosyaga ŵamkwakwe palemwisye, nambo akusaŵa ŵakuwusimana mtima soni akusapitilisya kwachimbichisya. (1 Petulo 3:4) Naga akusaka kwasalila ŵamkwakwe ngani jine jakwe akusasagula ndaŵi jambone jakuŵechetela. Nambosoni akusaŵechetaga mwaulemu.—Jwakulalichila 3:7.

Aŵeje Ŵakulupichika mu Ulombela

‘Jwamlume . . . akusalumbikana ni ŵamkwakwe ni kuŵa chilu chimo.’—GENESESI 2:24.

Jwamlume ni jwamkongwe palombene akusaŵa chilu chimo. Jemanjaji akusasosekwa kulimbisya ulombela wawo. Kuti yeleyi yikomboleche akusasosekwa kuŵechetana chenene soni kutendaga yindu yakulosya kuti akusaganichisyana. Akusosekwasoni kuŵa ŵakulupichika mwakuŵambala kutenda chikululu. Jwine patesile chikululu yikusaŵa yakupweteka mnope kwa mjakwe jwa mu ulombelajo. Nambosoni yikusatendekasya ŵalombane kutanda kukayichilana soni mpaka yitendekasye ulombela kumala.—Ahebeli 13:4.

Achinangolo Mwajiganyeje Ŵanache Ŵenu

“Mujiganyani chile mwanache litala lyambone lyakuti ajendemo, ni kuti atamose pati achekulwipe ngasatyoka mu lyele litalalyo.”—MISYUNGU 22:6.

Mlungu ŵapele achinangolo udindo wakwajiganya ŵanache ŵawo. Jemanjaji akusasosekwa kwajiganya ŵanache ŵawo kuti akole ndamo syambone. Ŵanache mpaka alijiganye yejinji kupitila muyakusatenda achinangolo. (Detulonomo 6:6, 7) Mwanache palemwisye nangolo jwalunda akusatenda yindu mwakuwusimana mtima. Jwalakwe akusaŵa “jwachitema kupikana, jwakokoŵa kuŵecheta, soni jwangatumbila chitema.” (Yakobo 1:19) Achinangolo payiweni kuti akusosekwa kumjamuka mwanache jwawo, akusatendaga yeleyi mwachinonyelo ngaŵa mwawukali.

Ŵanache Mwapikanileje Achinangolo Ŵenu

“Ŵanache, mwapikanileje achinangolo ŵenu . . . ‘Mwachimbichisyeje atati ŵenu ni mama ŵenu.’”—AEFESO 6:1, 2.

Ŵanache akusosekwa kwapikanila soni kwachimbichisya achinangolo ŵawo. Ŵanache pakwachimbichisya achinangolo, liŵasa likusaŵa lyakusangalala soni likusaŵa pamtendele. Ŵanache ŵachikulile pakwasamalila achinangolo akusalosya kuti akwachimbichisya. Mpaka atende yeleyi mwakulinganya yindu yayijonasiche panyumba, kapena kwapa mbiya kuti asume yakusosechela yapaumi.—1 Timoteo 5:3, 4.