Chiwa Chili Chakupweteka Mnope

“Une ni ŵamkwangu Sophia,a twatemi mu ulombela kwa yaka yakupunda 39. Nambo ŵamkwanguŵa ŵalwasile kwa ndaŵi jelewu kaneko ŵajasiche. Pandaŵiji, achimjangu ŵajinji ŵalimbikasyaga soni namsyene nalingagalingaga kutenda yindu yakungamuchisya. Nambope kwa chaka chamtundu yaliji mkumbweteka mnope mumtima. Ndaŵi syejinji nalagasikaga mnope nganisyo mwamti nalipikanaga kuti nganimba ngombwele kumalana nasyo. Apano pamasile yaka yitatu chiwile ŵamkwanguŵa, nambope ndaŵi sine yeleyi yikusandagasyape nganisyo mwangajembecheya.”—Kostas.

Ana akwete jwachibale jwawo juŵawile? Naga yili myoyo, nikuti mpaka yilandane ni yayamtendechele Kostas. Kupunda yindu yosope, chiwa cha ŵamkwawo, mlongo mjawo kapena mjawo jwapamtima mpaka chatendekasye kulagasika mnope nganisyo. Ŵandu ŵalijiganye yakulagasika nganisyo akusajitichisya yeleyi. Magasini jine (The American Journal of Psychiatry) jasasile kuti, “Ŵandu ŵajinji jwakunonyelwa jwawo pajasiche, yikusiyapweteka mnope ligongo akusaganisya kuti basi ngasawoneganasoni mpaka kalakala.” Mundu payimtendechele yakupweteka mpela yeleyi mpaka aliwusye kuti, ‘Ana kulagasika nganisyo kweleku chikujigale ndaŵi jelewu chamtuli kuti kumale? Ana chinjiŵasoni jwakusangalala? Ana ni chichi champaka chingamuchisye kumasya chanasa?’

Kwanga kwa yiwusyoyi chitukupate mu Ajimuche! ajino. Mungani jakuyichisya chitulole yindu yampaka yitutendechele naga jwakunonyelwa jwetu ajasiche pachangakaŵapa. Panyuma panganiji chitulole ngani sine syakamuchisya pakunandiya kulagasika nganisyo.

Ngatukukayichila kuti nganisi chisyatamiche mtima pasi, soni kwakamuchisya wosope ŵakulagasika nganisyo ligongo lya chiwa cha ŵakunonyelwa ŵawo.