12 Akoleje Yakulinga

ANA YELEYI YIKUGOPOLELA CHICHI?

Kola yakulinga nganikuŵa mpela yakusagamila yampaka agambeje kumbila yili yitendekwe. Yakulinga yisyesyene yikusasaka kola pulani jambone, kundilila, soni ngatenda yindu m’litala lyakata.

Yakulinga yine mpaka yijigale masiku, wiki, mwesi, chaka kapena kupunda pelepa kuti yikwanilichikwe. Nambo yakulinga yakujigala ndaŵi jelewu mpaka yikwanilichikwe uli ukombwele kaje kwanilisya yakulinga yamwanamwana.

LIGONGO LYAKWE KULI KWAKUSOSEKWA

Mundu jwangakola yakulinga akusaŵaga jwakulikayichila, jwangasangalala soni ngakusaŵa paunasi wakulimba ni achimjakwe.

Ungalikayichila: Naga akwete yakulinga yamwanamwana ni kuyikwanilisya, akusaŵa ŵakulimba mtima kuliŵichila yakulinga yekulungwakulungwa. Nambosoni mpaka akombole kumalana ni yakulingwa ya lisiku ni lisiku mpela kuŵambala yitendo ya achimjawo ŵakusakala.

Achimjawo: Ŵandu ŵajinji ngakusasangalalaga kunguluka ni ŵandu ŵanganakola yakulinga. Myoyo, kuti tulimbisye unasi wetu ni achimjetu tukusosekwa kunguluka ni ŵandu ŵakwete yakulinga yakulandana ni yetu.

Kusangalala: Mundu jwalepele kwanilisya yakulinga yakwe akusaŵa jwangasangalala.

Christopher jwatite, “Ngusanonyela kola yakulinga. Yeleyi yikusangamuchisya kuti ngoleje yakutenda yejinji yakuti nayikwanilisyeje. Sonitu pamkwanilisye chakulinga chenu ni kulola yamtesile mkusati, ‘Bola pele, yikomboleche yasachileje.’”

MFUNDO JA M’BAIBULO: “Naga mkwembecheya mbungo kapena mawunde, ngasimpanda chilichose soni ngasimgowola chilichose.”—Jwakulalichila 11:4, Today’s English Version.

YAKUSOSEKWA KUTENDA

Kuti akole yakulinga soni kuti ayikwanilisye, alinje kutenda ayi.

Akole yakulinga. Alembe yakulinga yakusosekwa mnope ni asagule chakusaka kutanda kuchikwanilisya, kaneko chaŵili, chatatu mpaka chakumalisya.

Akole pulani. Pachakulinga chilichose, atende yakuyichisyayi:

• Aliŵichile lisiku lyakumalisya kwanilisya chakulingacho.

• Amanyilile yayichisosekwa pandaŵijo.

• Amanyilile chile yakusawusya yampaka asimane nayo, kaneko aganichisye yampaka atende kuti amalane ni yakusawusyayo.

Atande kutendapo kandu. Akajembecheya kuti apate kaje chilichose chakwakamuchisya kuti atande. Aliwusye kuti, ‘Ana chindu chandanda champaka ndende chili chichi?’ Kaneko atande chelecho. Aloleje yakuti katende pamalisisye mbali jilijose.

MFUNDO JA M’BAIBULO: “Nganisyo sya mundu jwa mtawu sikusapindula.”—Misyungu 21:5.