NGANI JA PANDANDA
Yampaka Atende Kuti Akole Yisyoŵe Yambone
ALAMU jakumjimusya Austin pajilisile kundaŵi, akusajimuka ndaŵi jijojo. Kaneko, akusawala yakuwala yaŵakosecele kala kuti cawale pakwawula kukuwutuka. Jwalakwe aŵele ali mkutenda yeleyi katatu pa cijuma kutandila caka cipiteco.
Lisiku line, jwamkongwe jwine lina lyakwe Laurie jwamenyene ni ŵamkwakwe. Ligongo lyakutumbila soni ukali, jwajinjile m’kicini ni kujigala maswiti gejinji. Jwalile gosopego pandaŵi jimo. Yeleyi ni yakusatenda ndaŵi syosope patumbile.
Ana pana kulandana kulikose pasikati pa Austin ni Laurie? Elo kupali. Cinga acimsyenewo akumanyilila kapena iyayi, nambo jwalijose akwete yindu yakusatenda mwacisyoŵe.
Nambi uli wawojo? Ana akuganisya yakola yisyoŵe yine yakwe yambone? Komboleka kuti akusaka atendeje maseŵela gakulimbisya cilu, agoneje mwakwanila, soni kuti aŵecetaneje kaŵilikaŵili ni acalongo acimjawo.
Nambosoni, komboleka kuti akusaka kuleka yisyoŵe yine yakwe yangaŵajilwa, mpela kwemba sona, kapena kumalila ndaŵi jelewu pa Intaneti.
Nambo kusala yisyene, pakusaŵa ngondo kuti ulece yisyoŵe yangaŵajilwa. Yikusaŵa yangasawusya kuyitanda, nambo kuti uyilece yikusasawusya mnope!
Sano, ana mpaka atende yatuli kuti akole yisyoŵe yambone? Kwende tulole yindu yitatu yajikusala Baibulo yampaka yitukamucisye panganiji.