Aŵeje Ŵakulimba Mtima Soni Ŵakulupichika Mpela Benaya

Benaya juŵatumichile mu ulamusi wa Mwenye Daudi soni Solomo, jwaliji msilikali jwakulimba mtima. Benaya jwaliji mwanache jwa jwakutaga mbopesi. Ŵambopesi soni Alefi nganasosekwaga kuputa ngondo soni kukamulichisya masengo yida ya ngondo. Nambope, Benaya jwalipeleche mnope pakuputa ngondo syakuchenjela lina lya Yehofa. Jwalakwe jwalosisye kuti jwaliji jwakulimba mtima. Mwachisyasyo, jwalakwe jwajinjile mwisimbo ni kuwulaga lisimba. Konjechesya pelepa, jwamwuleje mundu jwine juŵakwete lipanga mmyala mwakwe. Mwamti Daudi ŵamŵisile Benaya kuti aŵe jwamkulungwa jwa asilikali ŵakwe ŵakumlondela.—2 Sam. 23:​20-23.

Benaya jwapitilisye kuŵa jwakulupichika kwa Daudi pandaŵi jele Abisalomu soni Adoniya ŵamjimuchile Daudijo. (2 Sam. 8:18; 15:18; 1 Ayi. 1:8) Mwamti Daudi ali achekulwipe, Benaya jwapitilisye kuŵa jwakulupichika soni ŵamkamuchisye Solomo kuti aŵe mwenye. (1 Ayi. 1:​32-40) Kusala yisyene, Benaya jwaliji mundu jwakulupichika kwa Yehofa soni kwa ŵandu ŵaŵasagwile Yehofa kuti aŵe mwenye atamose kuti ŵandu ŵane nganaŵa ŵakulupichika.

M’wejisoni tukusosekwa kuŵa ŵakulimba mtima kuti tukombole kulimbana ni mdani jwamachili mnope jwali Satana soni ŵandu ŵali ku mbali jakwe. Soni tukusosekwa kuŵa ŵakusimichisya kutenda yindu yakusasaka Yehofa. (Aef. 6:11; 1 Pet. 5:​8, 9) Atamose ŵandu ŵane pasagwile yakuleka kumtumichila Yehofa, m’weji tukusosekwa kupitilisya kuŵa ŵakulupichika ligongo jwalakwe chachitupa yindu yambone naga tukuŵa ŵakulupichika.—2 Sam. 22:26.