Yiwusyo Yakutyochela kwa Ŵakuŵalanga
Ana masengo gakulalichila gachimala chakachi?
Yesu jwatite, “Ngani syambone asi syakwamba ya Uchimwene sichilalichidwa pachilambo chosope chapasi kuti uŵe umboni kwa ŵandu ŵamitundu josope, kaneko mbesi jichiyika.” (Mat. 24:14) Maloŵe gandanda gaŵagagopolele kuti “mbesi” pa ndimeji, nambosoni pa ndime 6 ni 13 gakusagopolela kumala kwa chilambo cha Satanachi pa ngondo ja Alamagedo. (Chiw. 16:14, 16) Yeleyi yikwamba kulosya kuti tuchipitilisya kulalichila ngani syambone mpaka pajichiŵandichila ngondo ja Alamagedo. Apatu nikuti tuchenjile kapikanichisye ketu ka mfundo jeleji.
Munyumamu, twakulupililaga kuti tuchileka kulalichila ngani syambone payichitanda yakusawusya yekulungwa ligongo lya kwimuchilidwa kwa Babulo Jwamkulungwa. (Chiw. 17:3, 5, 15, 16) Mwamti twakulupililaga kuti payichigamba kutanda yakusawusya yekulungwayi, Yehofa ngasapelekasoni upile kwa ŵandu wakuti apikanilesoni ngani syambone. (Yes. 61:2) Twakulupililagasoni kuti ŵachachikulupuka pa yakusawusya yekulungwa chachiŵa ŵandu ŵaŵamtumichilaga Yehofa mwakulupichika mkaniyitande yakusawusya yekulungwayi. Mwamti ŵanduŵa twalandanyaga ni Ayuda ŵaŵakulupwiche pawajonanjidwaga msinda wa Yelusalemu mu 607 B.C.E. Yehofa jwaliji ali ŵasagwile kala Ayudaŵa kuti ni ŵachachikulupuka ligongo ŵamtumichilaga jwalakwe soni ŵaŵambalaga yakusakala. (Esek. 5:11; 9:4) Nambo yayatendechele Ayudaŵa yili yakulekangana ni yajwaŵechete Yesu pa Mateyu 24:14. Tukuŵecheta myoyo ligongo maloŵe ga Yesuga gakusalosya kuti ŵandu chachikola upile ŵakupikanila ngani syambone mpaka pajichiŵandichila ngondo ja Alamagedo.
Ligongo lyakuti tupikanichisye chenene yayili pa Mateyu 24:14, tuyiweni kuti tukusosekwa kuchengasoni kapikane ketu ka lilemba lya Chiwunukuko 16:21 lyalikusasala ya matalila gekulungwa. Panyuma pakuwungunyasoni chenene tuyiweni kuti malemba gaŵiliga gali gakamulana. Yayitukamuchisye kumanyilila yeleyi yili yajikusasala Baibulo pakwamba yakusatenda ŵandu papikene ngani syambone. Panganiji ndumetume Paulo jwalembile kuti, “kwa ŵandu ŵakwawula kukukulupuka,” utenga wa ngani syambone ukusaŵa mpela “liwungo lyakutyochela ku umi.” Nambo kwa adani ŵa Mlungu utengawu ukusaŵa wakusakala mpela “liwungo lyakutyochela ku chiwa.” (2 Akoli. 2:15, 16) Jemanjaji akusaŵengana ni ngani syambone sya Uchimwene ligongo sikusasala kuti chilambo chakusachinonyelachi chili chakusakala, chikulamulidwa ni Satana soni kuti sampano chichijonanjidwe.—Yoh. 7:7; 1 Yoh. 2:17; 5:19.
Amanyililesoni kuti lilemba lila lyasasile kuti matalila gekulungwa gakuwanichisya gala gachiŵa ‘gekulungwa mnope.’ Ayitu yikwamba kulosya kuti pa ndaŵi ja yakusawusya yekulungwa, tuchilalichilaga ngani syambone mwangapita mumbali. Mwamti pandaŵiji, lina lya Yehofa lichimanyikwa mnope kupundana ni kala kose. (Eks. 39:7) Myoyo komboleka kuti pachachigamba kumjonanga Babulo Jwamkulungwa, ŵane chachipikanila utenga ŵetu wawuchiŵa mpela kaliwungo kakununjila. Kombolekasoni chachikumbuchila kapena chachilijiganya yakuti kwa yaka yejinji ŵa Mboni sya Yehofa ŵaŵele ali mkulalichila kuti dini syaunami sichijonanjidwa.
Yayichitendekwayi yili yakulandana ni yayatendekwe ku Iguputo jwakala panyuma pa Milili 10. Yehofa ali apeleche “chilango kwa milungu josope ja mu Iguputo,” ŵandu ŵakwe ŵatyosile yimpepe ni “gulu ja ŵandu ŵamitundu jakulekanganalekangana” ŵanganaŵa Ayisalayeli. (Eks. 12:12, 37, 38) Komboleka kuti ŵanduŵa ŵatandite kumtumichila Mlungu panyuma pakuyiwona kuti yajwasasile Mose yakwamba Milili 10 yitendekwe.
Jwalijose juchachitanda kumtumichila Yehofa panyuma pa konanjidwa kwa Babulo Jwamkulungwa, chachikola upile wakwakamuchisya achimjakwe ŵa Yesu ŵachachiŵape pachilambopa. (Mat. 25:34-36, 40) Nambope upile wakulamulidwa kuŵa ngondolo uchimala mwachitema mkanijitande ngondo ja Alamagedo pachachigamba kumalisya kwajigala ŵasagulwe wosope ŵachachisigala pachilambopa kuti akapochele mbote jawo kwinani.
Kapikane ka sambanoka kagamba gombelechesya chanasa soni chinonyelo chekulungwa chakwete Yehofa. Kusala yisyene, jwalakwe “ngakusaka kuti jwine jwalijose ajonasiche nambo akusaka kuti wosope agalawuche mtima.”—2 Pet. 3:9.