Akoleje Mtima Wakusaka Kulijiganya Yasambano

Patukukosechela kulijiganya tuliwusyeje kuti, ‘Ana ngusaka kulijiganya chichi?’ Atamose kuti pana mfundo jine jakwe jatukusaka kulijiganya, nambope tukakundaga kuti yeleyo yitulepelekasye kumanyilila mfundo sine syasambano syakusaka kutujiganya Yehofa. Ana mpaka tutende uli kuti tukoleje mtima wakusaka kulijiganya yasambano?

Aŵendeje lunda. Amŵendeje Yehofa kuti jwakamuchisye kupikanichisya yakusaka kulijiganya pandaŵijo. (Yak. 1:5) Aŵambaleje kwikutila ni yindu yakumanyilila kala.—Mis. 3:​5, 6.

Akundeje kuti Maloŵe ga Mlungu gakamuchisyeje paumi wawo. “Maloŵe ga Mlungu gali gaumi.” (Aheb. 4:12) Mwamti “maloŵe” gaumiga mpaka gajiganye mfundo jinejakwe jasambano soni kwakamuchisya paumi wawo mmatala gejinji. Nambo yeleyi yikusakomboleka naga tukukunda kulijiganyapo kandu payindu yakutusalila Mlungu.

Ayamichileje yindu yosope yakusakamulichisya masengo Yehofa pakwajiganya. Yindu yakusatujiganya Mlungu yili mpela “yakulya yakunong’a.” (Yes. 25:6) Myoyo, akaŵambalaga “yakulya” yakuganisya kuti nganaŵa asangalele nayo pakulijiganya. Kutenda yeleyi kuchakamuchisya kuti aŵe mundu jwambone soni kuti asangalaleje pakulijiganya.