Mlongo Hulda Jwakwanilisye Chakulinga Chakwe
NAGA yaka yapachangakaŵapa ŵapite ku kachilumba kamwana ka Sangir Besar ku Indonesia, komboleka kuti ŵaweni alongo ŵatatu ali mungulugulu nyasa. Alongoŵa ali ŵakumanyika mnope pachilumbachi ligongo lya masengo gawo gakulalichila. Nambo komboleka kuti ŵasimene jemanjaji ali mkukamula masengo ga mtundu wine.
Chilumba cha Sangir Besar kumpoto kwa chilambo cha Indonesia
Chandanda, alongoŵa akusajinjilaga mnyasamo nikusosagasosaga maganga gekulungwa. Pagapatile akusagajigalaga ni kwawusya kumkuli. Gane mwa magangaga gakusaŵaga gekulungwa mpela mpila. Kaneko, alongoŵa akusatamaga pakampando kamwana nikutanda kasanya magangago ni hamala. Mwamti akusagakasaga mpaka kuŵa gamwana mnope kupunda lindanda. Kaneko, akusagaŵika m’mabeseni ni kwawusya kumangwawo. Tumagangato akusatulongaga mu yisaka yekulungwakulungwa ni kwasumisyaga ŵakulinganya misewu.
Mlongo Hulda, akulokota maganga mungulugulu nyasa
Jumo mwa alongo ŵakusakamula masengoga ali Hulda. Mlongoju akusamalila ndaŵi jakwe jejinji ali mkukamula masengoga kulekangana ni achimjakwewo. Jwalakwe akusakamulichisyaga masengo mbiya syakusapataga pakusumila yindu yakusosekwa pa liŵasa lyakwe. Nambo kaneko mlongoju jwatandite kukamula masengoga ni chakulinga chine. Jwalakwe jwasakaga kusuma tabuleti kuti akamulichisyeje masengo pologalamu ja JW Library®. Mlongoju jwamanyililaga kuti mafidiyo soni yindu yine yayikusasimanikwa pa pologalamuji mpaka yimkamuchisye pakulalichila soni pakujipikanichisya chenene Baibulo.
Mlongo Hulda jwakamulaga masengo lisiku lililyose kwa maawala gaŵili kundaŵi. Mwamti kwa mwesi ni hafu jwakombwele kasanya maganga gagumbala galimoto jamwana. Pambesi pakwe, jwapatile mbiya syakwanila kusumila tabuleti jila.
Mlongo Hulda ali ajigele tabuleti jakwe
Mlongoju jwatite, “Atamose kuti masengo gakukasanya maganga gali gakupweteka, naliŵalile mwachitema kupweteka kwa masengoga panatandite kamulichisya masengo tabuleti jangu pakulalichila mwakamula mtima soni kosechela misongano ja mpingo.” Jwasasilesoni kuti tabuletiji jamkamuchisye chakundanda kwa mlili wa Covid-19 kuti akomboleje kutenda misongano ja mpingo soni kulalichila. Tuli ŵakusangalala mnope kuti Mlongo Hulda jwakwanilisye chakulinga chakwe.