Yosope Yatandite ni Kumwetulila

ASIKANA ŵaŵili ŵajendaga mu msika wine wakwe m’tawuni ja Baguio ku Philippines. Jemanjaji ŵajiweni shelefu jakamulichisya masengo pakulalichila, nambo nganajawulapo. Pandaŵijo, Mlongo Helen jwaŵaliji pa shelefupo, jwagambaga kumwetulila ali mkwalola asikanawo. Asikanawo ŵapitilisye ulendo wawo, nambope ŵaganichisyaga mnope yaŵatite Helen pakwamwetulila.

Asikana ŵala paŵawujilaga kumangwawo ali akwesile basi, ŵachiweni chikwangwani chelembe jw.org chili pa Nyumba ja Uchimwene. Jemanjaji ŵayiweni kuti chikwangwanicho kuti chaliji chakulandana ni chaŵachiweni pa shelefu pala. Kaneko ŵatulwiche m’basi mula, ni ŵajile kukulola ndandanda ja misongano ja mpingo jajaliji pa geti ja Nyumba ja Uchimwene.

Asikana ŵala ŵapite kukusongana nawo. Paŵajinjilaga m’Nyumba ja Uchimwenemo, ŵagambile kuti gululu! ni Helen jula. Ŵamkumbuchile mwachitema kuti ali mundu jwakombola kumwetulila. Helen jwasasile kuti, “Asikanaŵa paŵayikaga kwanaliji une, natesile kawoga panandi. Naganisyaga kuti ndemwisye chine chakwe.” Nambo asikanawo ŵamsalile Helen kuti ŵam’weni lisiku line lyakwe ali pa shelefu.

Asikanawo ŵasangalele ni misongano soni chinonyelo cha abale ni alongo, mwamti nganalipikanagasoni kuti ali kuchilendo. Jemanjaji paŵaweni ŵane ali mkuswejesya Nyumba ja Uchimwene misongano jili jimasile, ŵaŵendile kuti akamuchisye nawo. Jumo mwa asikanawo jwapite chilambo chine. Nambo mjakwejo jwatandite kusongana soni kulijiganya Baibulo. Yosopeyi yatandite ni kumwetulila basi.