UMI WETU WACHIKLITU
Ana Mpaka Tukamulichisye Masengo Chamtuli Mafidiyo Gakusala ya Lijiganyo lya Baibulo?
Tukwete mafidiyo mcheche gakusala ya lijiganyo lya Baibulo. Ana chakulinga cha mafidiyoga chili chamtuli?
Fidiyo jakuti Ligongo Chichi Tukusosekwa Kulijiganya Baibulo?—Fidiyo Josope ŵajipanganyisye kuti jatendekasyeje ŵandu kusaka kulijiganya Baibulo pangajigalila kuti akusakulupilila yamtuli. Fidiyoji jikusijalimbikasya ŵandu kuti akamulichisyeje masengo Baibulo pakusaka kupata kwanga kwa yiwusyo yakusakola yakwamba umi. Soni jikusasala yisyasyo ya yiwusyoyi soni kwanga kwakwe. Nambosoni jikusasala yampaka atende mundu kuti atande kulijiganya Baibulo.
Fidiyo jakuti Ligongo Chichi Tukusosekwa Kulijiganya Baibulo? (kambali ka fidiyo) jili jakulandana ni jandanda, yigambile kuŵa kuti aji ŵajijipiye. Fidiyoji jikusaŵa jakamuchisya kumadela gele ŵandu ŵakwe akusaŵa pachitema.
Fidiyo jakuti Ana Palijiganyo lya Baibulo Pakusatendekwa Yatuli? ŵajipanganyisye kuti jatendekasyeje ŵandu kusaka kulijiganya Baibulo ni m’weji kwalulele. Fidiyoji jikusajanga yiwusyo yine yakusakola ŵandu pangani jakulijiganya Baibulo. Nambosoni jikusasala yampaka mundu atende kuti atande kulijiganya Baibulo.
Fidiyo jakuti Twapochele ku Lijiganyo lya Baibulo ŵajipanganyisye kuti tumlosyeje mundu jwatukusamjiganya Baibulo. Atamose kuti fidiyoji jikusimanikwa pa peji 2 mu buku ja Asangalaleje Mpaka Kalakala nambope mpaka tumlosye mundu patukukambilana najo kabuku ka Asangalaleje Mpaka Kalakala. Fidiyoji jikusasala yayili m’bukuji soni yachatendeje pakulijiganya bukuji.
Atamose kuti fidiyo jilijose jikwete chakulinga chakwe nambope mpaka tumlosye kapena kumtumichisya mundu pandaŵi jilijose jatukusosechela kutenda yeleyo. Tukwalimbikasya ŵakulalichila wosope kuti agamanyilileje chenene mafidiyoga soni agakamulichisyeje masengo chenene pali mu utumiki.