Akulupilileje Kuti Mlungu Chachitukulupusya

Pachangakaŵapa kuwusimana mtima kwa Yehofa chikuyiche pamalile gakwe mwamti chajonanje ŵandu ŵakusakala. Dini syaunami sichijonanjidwa, yilambo yichikamulana kuti yijimuchile ŵandu ŵa Mlungu, soni Yehofa chachajonanga ŵandu ŵakusakala pa Alamagedo. Aklistu akwembecheya mwalung’wanu yindu yakusosekwa mnopeyi.

Yili yisyene kuti ngatukumanyilila yindu yosope yayichitendekwa pa yisawusyo yekulungwa. Mwachisyasyo, ngatukumanyilila kuti yichitanda chakachi. Ngatukumanyilila kuti ŵandale chachisala yindu yamtuli yayichatendekasya kwimuchila madini. Ngatukumanyilila kuti yilambo yichajimuchila ŵandu ŵa Mlungu kwa ndaŵi jelewu wuli soni kuti yichitendekwaga yamtuli. Ngatukumanyililasoni yachachikamulichisya masengo Mlungu pakwajonanga ŵandu pa Alamagedo.

Nambope, Baibulo jikusasala yindu yosope yatukusosekwa kumanyilila. Yeleyi yikusatukamuchisya kuti tuŵeje ŵakulimba mtima patukwembecheya yindu yachiyitendekwe kusogoloku. Mwachisyasyo, tukumanyilila kuti tukutama kumbesi kwa “masiku gakumalisya.” (2Ti 3:1) Tukumanyililasoni kuti masiku ga yisawusyo yekulungwa “chachigajipiya” kuti dini jakuwona jikajonanjidwa. (Mat 24:22) Tukumanyililasoni kuti Yehofa chachakulupusya ŵandu ŵakwe. (2Pe 2:9) Nambosoni tukumanyilila kuti mundu jwele Yehofa ŵamsagwile kuti chajonanje ŵandu ŵakusakala soni kwakulupusya ŵandu ŵa m’likuga lyekulungwa pa Alamagedo ali jwachilungamo soni jwamachili.—Chw 19:11, 15, 16.

Yachiyitendekwe kusogoloku yichatendekasya ŵandu ‘kukomoka ligongo lya woga.’ Tukusosekwa kuŵalanga soni kuganichisyaga mwakusokoka yaŵatite Yehofa pakwakulupusya ŵandu ŵakwe munyumamu soni yatusalile kuti chatende kusogoloku. Yeleyi mpaka yitutendekasye ‘kwima ni kukwesya mitwe’ jetu tuli mkumanyilila kuti chikulupusyo chetu chiŵandichile.—Luk 21:26, 28.