Yindu Yitatu Yampaka Tutende Pakulosya Kuti Tukusamdalila Yehofa

Daudi jwamwuleje Goliyati ligongo lyakuti jwamdalilaga Yehofa. (1Sa 17:45) Yehofa akusakamulichisya masengo machili gakwe pakwakamuchisya ŵakutumichila ŵakwe wosope. (2Mb 16:9) Ana mpaka tulosye chamtuli kuti tukusamdalila Yehofa mmalo mwakudalila lunda lwetu soni yatukusakombola kutenda? Kwende tulole yindu yitatu yatukusosekwa kutenda:

• Apopeleje ndaŵi syosope. Yili yisyene kuti tukusapopela kuti Yehofa atukululuchile yakulemwa yetu nambope tupopelejesoni patusimene ni yindu yampaka yitutendekasye kulemwa. (Mat 6:12, 13) Tumŵendeje Yehofa kuti atupeje lunda soni kutulongolela mkanitusagule yakutenda, tukagambaga kumŵenda kuti atukamuchisye pa yindu yatusagwile kala.—Yak 1:5.

• Aŵalanjeje soni kulijiganya Baibulo. Aŵalanjeje Baibulo lisiku lililyose. (Sal 1:2) Aganichisyeje yisyasyo ya ŵandu ŵakusiŵasala m’Baibulo soni atendeje yalijiganyisyeyo. (Yak 1:23-25) Pakwawula mu utumiki akosecheleje mmalo mwakwamba kudalila yindu yaŵele ali mkutenda munyuma. Akosechelejesoni misongano, yeleyi yichakamuchisya kuti apinduleje ni misonganojo.

• Akamulaneje ni Gulu ja Yehofa. Amanyilileje yindu payichenjile m’guluji soni mwachitema atendeje yindu mwakamulana ni kuchengako. (Nu 9:17) Twapikanileje achakulungwa ŵa mumpingo pakutujamuka soni pakutulongolela.—Ahe 13:17

ALOLELE FIDIYO JAKUTI TUKAJOGOPAGA KULAGASIDWA, KANEKO AJANJE YIWUSYO AYI:

• Ana abale ni alongo ŵa mufidiyoji ŵajogopaga yindu yapi?

• Ana ni chichi chachakamuchisye kuti amalane ni wogawo?