Ana Kabuku ka Kulijiganya Malemba Lisiku Lililyose Kakwakamuchisya?

Ana lisiku lililyose pakutenda yausimu akusapwatikapo kuŵalanga Baibulo soni ndemanga ja mkabuku ka Kulijiganya Malemba Lisiku Lililyose? Naga kwanga kwawo kuli iyayi, ana mpaka alinganye yakuti atendeje yeleyi lisiku lililyose? Ŵandu ŵajinji akusatenda lilemba lyesiku kundaŵi. Yeleyi yikusakamuchisya kuti aganichisyeje yalijiganyisyeyo pakukamula masengo gawo galisikulyo. (Yos. 1:8; Sal. 119:97) Ana Lilemba lyesiku mpaka lyakamuchisye chamtuli? Aŵalanjeje palityochele lilembalyo m’Baibulo. Alinjeje kuganichisya Malemba gane gagakugombelechesya chiwundo cha palilemba lyesikulyo. Kaneko akamulichisyeje masengo chiwundocho pa umi wawo. Naga akusaganichisya Maloŵe ga Mlungu pakutenda yisagula yawo chachikunda kuti galongoleleje pa umi wawo.—Sal. 119:105.

Mabeteli ga pachilambo chosope gakusatenda lilemba lyesiku panyuma pa chakulya chakundaŵi. Yaka yapachangapaŵapa ŵatandite kuŵika yiwundo yakusakambilana palilemba lyesiku pa JW Broadcasting^® pasi pa kamtwe kakuti MAPOLOGALAMU SONI YAKUTENDEKWA. Ana pakwete palolelele mbali jeleji? Komboleka kuti yine mwa yindu yakusaŵika pelepa ni yatukusasosechela. Mwachisyasyo patukutenda chisagula ana ngani ja Loti jikusatukwaya chamtuli?

ALOLELE FIDIYO JAKUTI, AKANONYELAGA YINDU YA M’CHILAMBO (1 Yoh. 2:15), KANEKO AJANJE YIWUSYO AYI:

• Pakulambila kwakundaŵiku, ana ni chiwundo chekulungwa chapi cha m’Baibulo chakuchilondesya?

• Ana ngani ja Loti jikulosya chamtuli kogoya kwa kunonyela chilambo kapena yindu ya m’chilambo?—Gen. 13:12; 14:12; 19:3, 12, 13, 24-26

• Ana mpaka tulosye chamtuli kuti tukusamnonyela Yehofa ngaŵaga chilambo kapena yindu ya m’chilambo?