“Ndamo Syetu Syakulitulusya Soni Kuchimbichisya”

Ndamo jambone jakusalosya achakongwe Ŵachiklistu ŵalombedwe mpaka jakamuchisye achiŵamkwawo kutanda kulijiganya usyesyene. Nambope, yeleyi kuti yitendekwe akusosekwa kupilila kwa yaka yejinji. (1 Pet. 2:21-23; 3:1, 2) Naga akulaga ligongo lya yindu yangali chilungamo, apitilisye kugomeka chakusakala pakutenda yindu yambone. (Alo. 12:21) Chisyasyo chawo chambone, mpaka chakamuchisye mnope ŵamkwawo kutanda kupikanila pakwasalila ya Yehofa.

Alinje kulola mwakusatendela yindu mjawo jwa mu ulombela. (Afil. 2:3, 4) Atendeje yakomboleka pakwanilisya udindo wawo mwauchimbichimbi mwakulosya chanasa soni kwayidwa. Aŵeje jwakupikanila jwambone. (Yak. 1:19) Aŵeje ŵakulitimalika, soni ŵasimichisyeje ŵamkwawo kuti akusiŵanonyela. Atamose kuti jwamlumejo ngakwalosya wawojo umbone mtima soni ngakwachimbichisya, mpaka aŵe ŵakusangalala ligongo Yehofa akusayamichila kukulupichika kwawo.—1 Pet. 2:19, 20.

ALOSYE FIDIYO JAKUTI, YEHOFA AKUSATUKAMUCHISYA KUTI TUNYAKULE KATUNDU JWETU, KANEKO AJANJE YIWUSYO AYI:

• Ana yindu yaliji wuli kundanda kwa ulombela wa Grace Li?

• Ana ni chichi chachamtendekasisye kuti atande kulijiganya Baibulo?

• Ana mlongo Li jwapilile uli yindu yakusawusya panyuma pakubatiswa?

• Ana mlongo Li jwapopelaga yamtuli pakwamba ya ŵamkwakwe?

• Ana ni majali gapi gapatile mlongo Li ligongo lya ndamo jakwe jakulitulusya soni uchimbichimbi?