Kongolela Katende Ketu ka Undumetume—Agaŵileje Buku ja Baibulo Jikusajiganya Cici

Ligongo Lyakwe Kuli Kwakusosekwa? Buku ja Baibulo Jikusajiganya Cici jili jandanda pa mabuku getu gatukusakamulicisya masengo pakulijiganya ni ŵandu. Nambope, mkanitutande kulijiganya ni mundu jwalijose, tukusosekwa kumlecela bukujo. M’yoyo, jwalijose akusosekwa kulingalinga kuti amanyilileje cenene ka gaŵile ka buku ja Baibulo Jikusajiganya Cici pali mu undumetume. (Miy. 22:29) Pana matala gejinji gampaka ŵakulalicila asagule kuti agakamulicisyeje masengo.

Mwampaka Tutendele:

Awusyeje ciwusyo campaka cimtendekasye msyenenyumba kutenda lung’wanu soni campaka cakamucisye wawojo kwawula najo pa mtwe winewakwe m’bukujo. Mpaka asagulesoni cimo mwa yiwusyo yayili kundanda kwa mtwe uliwose. Ali amalisisye kupikanila kwanga kwa msyenenyumbajo aŵalanje lilemba lyakuŵajilwa soni amlosye ndime jajikusala ya nganijo kaneko atagulilane najo mwakata.
Litala line lili kamulicisya masengo yayili pa peji jandanda ni cakulinga cakuti tumtendekasye msyenenyumbajo kola lung’wanu, kaneko amlosye msyenenyumbajo kwanga kwakwe kutyocela m’bukujo kuti amanyilile yajikusasala Baibulo. Mwambone, mpaka asale ngani jinejakwe jakutesya canasa jajikopwece pacangakaŵapa mu nyusi, kaneko atagulile mwele ŵandu ŵajinji akusasaka kumanyilila kwanga kwa yiwusyo yayili pa peji 3. Kapena mpaka aŵecete kuti akukunguluka ni ŵandu pakwamba ya yindu yakusangalasya yayili msogolo. Kaneko amlosye yiwulili yayili pa peji 4 mpaka 5 ni am’wusye kuti, “Ana yindu yapi yaŵasasile Mlungu yakusaka kuti cayiwone yili mkwanilicikwa?” Litala line lyampaka lyakamucisye mwine mpaka aŵecete kuti, akukunguluka mwakata ni ŵandu pakusaka kwakamucisya kupata kwanga kwa yiwusyo yakusosekwa mnope paumi. Kaneko amlosye msyenenyumbajo yiwusyo yayili pasi pa peji 6, ni amsalile kuti asagule ciwusyo cakusaka kumanyilila kwanga kwakwe.
Am’ŵende msyenenyumba kuti alijiganyeje najo Baibulo. Mpaka aŵecete kuti, “Tukwalosya ŵandu mwatukusatendela lijiganyo lya Baibulo. Ana pakwete payiweni mwatukusatendela? [Ajembeceye kuti ajanje.] Naga akwete ndaŵi panandi ngusaka nalosye mwatukusatendela pakamulicisya masengo Baibulo jawo.”

Alinje Kutenda Yakuyicisyayi Mwesi Awuno:

Pakulambila kwawo kwa peŵasa, alinjilile kutenda yatutagulileneyi.
Pali mu Undumetume, ŵasalile ŵakulalicila amcijawo yakosecele. (Miy. 27:17) Aŵeje ŵakoseka kucenga naga yakosecele ngayikwayika ŵandu pamtima.