Yampaka Tutende Kuti Twayiceje Pamtima Ŵatukusitwajiganya
1. Ana yaŵajiganyaga Yesu yakwete yakuyicisya yatuli m’mitima ja ŵandu ŵaŵampikanilaga?
1 Yesu Klistu ŵayikaga pamtima ŵandu ŵaŵampikanilaga. Pandaŵi jine, mitima ja ŵakulijiganya ŵakwe “jatesile mpela jikolele ni moto” pambesi pakwasalila mwakupikanika yagakusasala Malemba. (Luk. 24:32) Pakuŵapo kumpikanila Mlungu kukusatandila mumtima, ana mpaka tutende yatuli pakolosya nganisyo sya ŵatukusitwajiganya kuti akacelewa kucenga ndamo syawo?—Alo. 6:17.
2. Ana kalamuka soni kumanyilila mpaka kutukamucisye catuli kuti tumyice pamtima mundu?
2 Tuŵeje Ŵakalamuka soni Ŵalunda: Ŵandu ŵajinji kwamba kwasalila yindu yambone ni yakusakala yayikusamsakalisya Mlungu ngaŵa mkwakamucisya kuti atendepo kandu. Kusala yisyene, kuŵalanga malemba gejinji ni mundujo ngaŵa mkukamucisya kuti alece yikulupi yakwe. Kuti tumlimbikasye mundu, candanda tukusosekwa kumanyilila ligongo lyakwe akusakulupilila yindu yine soni kutenda m’litala line lyakwe. Mwakalamuka, tusaguleje yiwusyo yampaka yimlimbikasye kusala yayili mumtima mwakwe. (Miy. 20:5) Kaneko, mpaka tulole kutyocela m’Baibulo malemba gampaka gamyice pamtima mundujo. M’yoyo, tuŵeje ŵalung’wanu soni ŵakulitimalika patukutenda najo yindu. (Miy. 25:15) Tukumbucileje kuti ŵandu ŵane akusajawula pasogolo mwausimu mwacitema, ŵane mwakokoŵa. M’yoyo, tukusosekwa kumpa ndaŵi kuti msimu wa Yehofa wumkamucisye kucenga nganisyo soni yitendo yakwe.—Maliko 4:26-29.
3. Ana mpaka tutendeje catuli kuti twakamucisyeje ŵatukusitwajiganya kola ndamo syambone?
3 Twakamucisyeje Kuti Aŵeje ni Ndamo Syambone: Malemba ga m’Baibulo gagakusasala umbone soni cinonyelo ca Yehofa mpaka gakamucisye ŵatukusalijiganya nawo Baibulo kola ndamo syambone. Mpaka tukamulicisye masengo lilemba lya Salimo 139:1 mpaka 4 kapena Luka 12:6, 7 kuti twamanyisye ŵatukusitwajiganya Baibulo kulola kuti Yehofa akusatenda lung’wanu ni jwalijose. Mundujo pakwendelecela kusya mtima wakwe ŵakuyamicila umbone wa Yehofa pajika, caciŵa jwakusacilila mnope kumnonyela soni kulipeleka kwa Mlungu. (Alo. 5:6-8; 1 Yoh. 4:19) Nambosoni, palijiganyisye kuti yitendo yakwe yikusamkwaya Yehofa, yicimlimbikasya kuti atende yindu m’litala lyakumsangalasya soni kumcimbisya Yehofa.—Sal. 78:40, 41; Miy. 23:15.
4. Patukwajiganya ŵandu mu undumetume, ana mpaka tulosye catuli kuti tukusacimbicisya ukoto wawo wakulisagulila?
4 Yehofa jwangamkanganicisya jwalijose kuti apikanile malamusi gakwe. M’malo mwakwe, jwalakwe akusayamicila naga mundu alisagulile jika kamulicisya masengo lunda lwakwe pakuya malamusi ga Mlungu. (Yes. 48:17, 18) Tukusamsyasya Yehofa patukwajiganya ŵandu m’litala lyakwakamucisya kuti alisagulileje jika yampaka atende. Naga mundu pajika ayiweni kuti akusosekwa kucenga yitendo yakwe, yakuyicisya yakwe yikusaŵa yakutamilicika. (Alo. 12:2) Yicimkamucisyasoni kuti am’ŵandicile mnope “jwakuwungunya mitima,” Yehofa.—Miy. 17:3.