Liboksi Lya Yiwusyo

◼ Ana ŵakulalicila akusosekwa kamulicisya masengo Intaneti kuti ŵalalicileje kapena kwajiganya Baibulo ŵandu ŵangakwamanyilila ŵa m’yilambo yine?

Ŵakulalicila ŵane akusakamulicisya masengo Intaneti kuti apate ŵakulijiganya Baibulo m’yilambo yaŵalekasisye masengo getu kapena m’yilambo yayikwete ŵakulalicila ŵamnono. Ndaŵi sine pakusaŵa yakuyicisya yambone. Nambope, ndaŵi sine yikusaŵa yakogoya kuti jwa Mboni aŵecetaneje pa imelo ni mundu jwangakummanyilila. (Alole Undumetume wa Ucimwene wa July 2007 papeji 3.) Atamose kuti yili yakomboleka kupata ŵandu ŵa mitima jambone pa intaneti nikwasalilaga ya Ucimwene, nambo ndaŵi sine yeleyi mpaka yitendekasye m’bale kapena mlongo kutanda kuŵecetana ni ŵandu ŵakusakala, kupwatikapo ŵakusapuka. (1 Akoli. 1:19-25; Akolo. 2:8) Nambosoni, m’yilambo yele masengo gakulalicila ya Ucimwene ŵagalekasisye, ŵaboma komboleka kulolaga yakutagulilana ŵandu pa intaneti, yampaka yiŵice umi wa abale ni alongo ŵetu pangosi. M’yoyo, abale ni alongo akawungunyaga pa intaneti ŵandu ŵakuti ŵalalicileje.

Naga mwaupile tulalicile kwa mundu jwakutyocela m’cilambo cine, tugambe kumsalila ya webusayiti jetu ja jw.org kuti alijiganye yejinji, soni kumsalila yampaka atende kuti akaŵecetane ni nyambi ja kumangwakwe pawujilile, kulekapo naga ofesi ja nyambi jitukundile kuti tuŵecetaneje najo kupitila pa intaneti. Mpakasoni tumlimbikasye kuti akajawule ku Nyumba ja Ucimwene jajili ciŵandika kumangwakwe. Yili yisyene kuti m’yilambo yine mwangali Nyumba sya Ucimwene. Nambope, naga mundujo akusacilila kuti akalijiganyeje Baibulo ni jwa Mboni, tukusosekwa kulemba fomu ja Akawonegane ni Mundu Aju (S-43) ni kumpa mlembela jwa mumpingo mwetu. Jwalakwejo cacitumisya fomuji ku ofesi ja nyambi kupitila pa jw.org, imelo, kapena mu yunivelopu. Ofesi ja nyambi jajikusalolela masengo gakulalicila m’cilambo cakutama mundujo jikusamanyilila mwayiŵelele yindu mwati jicilola yampaka jitende kuti jimkamucisye mundujo.—Alole Undumetume wa Ucimwene wa June 2014 papeji 7, ni wa November 2011 papeji 2.

Naga mundu jwatukulijiganya najo Baibulo apano asamile m’cilambo cine kapena naga tukulijiganya ni mundu jutwamanyigene najo kupitila pa intaneti tukusosekwa kuya yatusasile mungani ajino. Atamose yili m’yoyo, ngatukusosekwa kwamba kumleka ndaŵi jimo. Tukusosekwa kwendelecela kusya lung’wanu lyakwe mpaka pacaciyika jwakulalicila jwa mumkuli wakwe. Nambope, tukusosekwa kuŵa ŵakusamala patukutagulilana ya m’Baibulo ni mundujo naga m’cilambo cakutama masengo getu ŵagalekasisye.—Mat. 10:16.