Tuŵeje ni Cakulinga Cakutenda Ŵakulijiganya
1. Ana tukusosekwa kutenda cici kuti ŵandu cakulupuce?
1 Lipoti lya undumetume wa mumgunda lya caka ca 2014 likulosya kuti ŵandu ŵa Mlungu ŵatesile mtawu pakulalicila ngani syambone syakwamba ya Ucimwene. (Mat. 24:14) Kupunda ni kala kose, apano tukombola kwayicila ŵandu ŵajinji ni utenga wa m’Baibulo ligongo lyakulalicila kunyumba ni nyumba, masengo gagaŵila tumapepala, soni kulalicila m’malo mwakusimanikwa ŵandu ŵajinji. Nambope, kuti ŵandu cakulupuce, tukusosekwa kwakamucisya kuti aŵe ŵakulijiganya ŵa Yesu mwakwajiganya Baibulo.—1 Tim. 2:4.
2. Ana yiwusyo yapi yampaka yitukamucisye kwaŵenda ŵandu kuti tulijiganyeje nawo Baibulo?
2 Nganisyo Syetu Siŵeje Pakutandisya Lijiganyo lya Baibulo: Mundu palosisye lung’wanu, ana akusam’ŵenda kuti ŵape nambala jakwe ja foni, kapena kuti ŵasalile kwakutama ni cakulinga cakuti awujilesoni mwacitema kutandisya lijiganyo lya Baibulo? Ana cakaci cele twamlosisye mundu paulendo wandanda mwatukusatendela lijiganyo lya Baibulo? Ana pakwete patum’ŵendile mundu jwatukusampa magasini mwesi ni mwesi kuti tulijiganyeje Baibulo? Ana pakwete paŵalosisye kafidiyo kakuti Ligongo Cici Tukusosekwa Kulijiganya Baibulo? ni kakuti Ana pa Lijiganyo lya Baibulo Pakusatendekwa Yatuli? acimjawo ŵa kumasengo, ŵakusukulu, ŵakuŵandikana nawo nyumba, acalongo acimjawo, soni ŵane? Pakulalicila pakamulicisya masengo matebulo, ana akusamsalila mundu jwajigele buku jakulijiganyila kuti mpaka alijiganyeje Baibulo ni mundu jwine pakamulicisya masengo bukujo?
3. Ana tukusosekwa kutenda cici kuti tujiganyeje usyesyene mwakamula mtima?
3 Yehofa ni Yesu Mpaka Atukamucisye: Yesu ŵatandite ni maloŵe gakuti ‘ajawule’ pakutulamula kuti ‘tukajiganye ŵandu.’ Maloŵega gakulosya kuti tukusosekwa candanda kutenda mtawu. Nambope, ŵasasile kuti ngasatuleka jika, caciŵa ni m’weji. (Mat. 28:19, 20) Yehofa atupelesoni msimu wakwe weswela, yindu yakamulicisya masengo pakwiganya usyesyene, soni atujiganyisye mwampaka twajiganyile ŵane. (Zek. 4:6; 2 Akoli. 4:7) Tukusosekwa kupopela kwa Mlungu kuti atupeje macili, soni kuti atukamucisye kuti tuŵe ŵakusacilila kamula nawo masengo gakusosekwaga.—Afi. 2:13.
4. Ligongo cici tukusosekwa kola cakulinga cakutenda ŵakulijiganya?
4 Tukusaŵa ŵakusangalala pakulalicila ngani syambone. Nambo tukusasangalala mnope patumjiganyisye mundu usyesyene ni kutanda ‘kwenda pa litala lyakwinjilila ku umi.’ (Mat. 7:14; 1 Ates. 2:19, 20) Cakusosekwa mnope ni cakuti tukusamsangalasya Yehofa, jwele ‘ngakusaka kuti jwalijose ajonasice nambo kuti apitikuce mtima.’—2 Pet. 3:9.