Mwampaka Tulalicile Pakamulicisya Masengo Matebulo Gakuŵika Mabuku

Kulalicila pakamulicisya masengo matebulo gakusaŵika mabuku kapena kangolo, lili litala lyambone lyakupatila ŵandu ŵamitima jambone kuti alijiganye usyesyene. (Yoh. 6:44) Ni ligongo lyakwe acakulungwa aŵele mkwalimbikasya kuti aŵiceje matebuloga mumkuli wa mpingo wawo kwakukusasimanikwa ŵandu ŵajinji. Pakuŵa matebuloga gakusakomboleka kuganyakula ni kuja kugaŵika malo gane, nganikuŵa kwakusosekwa kuti akaŵende kaje kwa acakulungwa ŵa msinda kuti atande kugakamulicisya masengo. Ana ŵani ŵali ŵakuŵajilwa kulalicila pakamulicisya masengo matebuloga? Ŵakulalicila ŵakusaganisya cenene, ŵandamo syambone, soni ŵakombola kutagulilana cenene ni ŵandu. Yakuyicisyayi yili yindu yakusasosekwa ni yele yangakusosekwa kutenda pakulalicila pakamulicisya masengo matebuloga.

Yakusosekwa Kutenda:

Aŵeje ŵakungulucika kwa ŵandu ŵakupita. Ŵakulalicila ŵane akusiŵamwemwetelaga ŵandu ŵakupita, soni akusiŵapaga moni mwacinonyelo. Naga mundu jwine pakupita akulolecesya patebulo jamabukujo, mpaka amsalile kuti, “Komboleka kujigala buku jilijose pelepa naga akusaka.”
Ajime pamalo gakutalikangana cenene ni tebulojo. Ŵakulalicila ŵane ayiŵeni kuti kwima mwakuŵandicila tebulojo kuli kwakamucisya mnope. Nambo ŵane ayiweni kuti kwima mwati m’yi kukusatendekasya ŵandu ŵakupita kutenda sooni kuti ajime, m’yoyo akusajimaga mwakutalikangana panandi ni tebulojo mpaka ŵakupita ajime. Mundu pajimi pa tebulojo, alinje kuŵecetana najo. Mwine mpaka am’wusye kuti “Ana pakwete paliwusisye ciwusyo cati mpela celeci?”
Akamulicisyeje masengo Baibulo pa lipesa lililyose.
Amsalileje jwalijose jwajigele buku jakulijiganyila mpela ja Baibulo Jikusajiganya Cici kuti mpaka apatesoni upile wakulijiganya Baibulo ni ŵamboni sya Yehofa. Ŵalosyejesoni ŵandu kafidiyo ka mtwe wakuti, Ligongo Cici Tukusosekwa Kulijiganya Baibulo? kupitila pa foni jawo.
Naga kuli kwakomboleka awusyeje ni kulemba kwakutama mundu jwalosisye lung’wanu. Naga mundujo ngakusatama mumkuli wawo, alembeje kafomu kakuti, Akawonegane ni Mundu Aju (S-43) ni kuja kumpa mlembela mwacitemacitema.