Akuyeje Cisyasyo ca Ŵakulocesya—Nahumu
1. Ana tukulijiganya cici kutyocela m’buku ja Nahumu?
1 Masame ga msinda wa Ninefe gakusatukamucisya kumanyilila kuti Yehofa ali jwakupakombola kwawucisya, soni kwagomeka acimmagongo ŵakwe atamose aŵe ŵakogogoya catuli. (Nah. 1:2, 6) Buku ja Nahumu jikwete majiganyo gejinji gakutukamucisya patuli mu undumetume.
2. Ana mpaka tutende uli kuti utenga wetu uŵeje wakamula mtima?
2 Aŵeceteje Maloŵe Gakutondoya, Soni Gakupeleka Cembeceyo: Mundu paŵalasile bukuji akusagamba kupikana ya utenga wakwelusya wakwawula ku msinda wa Ninefe wawaliji likulu la cilambo ca Asuli. (Nah. 1:1; 3:7) Nambope, maloŵe gakwelusya gelega galiji ngani jakusangalasya kwa ŵandu ŵa Yehofa. Pakuŵa lina lyakuti Nahumu lyakusagopolela kuti “Jwakutondoya,” Ayuda ŵasimicisye mumtima kuti Yehofa cajonanje acimmagongo ŵawo! Nahumu ŵasalilesoni ŵanduwo kuti Yehofa ali “malo gakuŵa pandaŵi ja yipwetesi.” (Nah. 1:7) Patukusalalicila, tukusitwasalila ŵandu utenga wanbone, soni kwalimbilasya ŵane kuti atilile kwa Yehofa.—Nah. 1:15.
3. Ana mpaka tumsasye catuli Nahumu pakamulicisya masengo yisyasyo, soni yiwanicisyo?
3 Akamulicisyeje Masengo Yisyasyo, Soni Yiwanicisyo: Mwakusaliligwa ni Yehofa, Nahamu ŵasasile kuti konasika kwa msinda wa Ninefe kuciŵa mpela kwa msinda wa Tebesi kapena kuti No-amoni, wa ku Eguputo waŵawujonasile Asuli. (Nah. 3:8-10) Patukuŵecetana ni ŵandu pakwamba ya mbesi ja ukoto wa yindu wakusakalawu, tugombelecesyeje ya yakulocesya ya m’Baibulo yayikusalosya kuti Yehofa akusakwanilisya maloŵe gakwe gosope gaŵaŵecete. Mwambone, pandaŵi jele Ababulo ni Amedi ŵawujimucile msinda wa Ninefe mu 632 B.C.E., wula jamacili mnope jatendekasisye kuti lusulo lwa Tigilisi lugumbale, m’yoyo mesi gakwe gagwisisye mbali jine ja mapupa ga msindawo. Yeleyi yatendekasisye kuti msinda wa Ninefe ujonanjikwe mwakamulana ni maloŵe ga Yehofa.—Nah. 1:8; 2:6.
4. Ana tutendeje yatuli kuti tuŵeceteje yakupikanika mu ndumetume?
4 Aŵeceteje Yakupikanika: Paŵalembaga bukuji, Nahumu ŵakamulicisyaga masengo yisyasyo ya yindu yakutendekwa. Jwalakwe ŵalembaga yakupikanika cenene. (Nah. 1:14; 3:1) M’wejisoni tukusosekwa tukamulicisyeje masengo maloŵe gangasawusya kugapikana. (1 Akoli. 14:9) Patuyice panyumba, tukusosekwa tusaleje mwakupikanika cenene lisosa latuyicile. Patukutendesya majiganyo ga Baibulo, twakamucisyeje ŵandu kusya cikulupi cawo kwa Yehofa, soni kuyamicila maloŵe gakwe paumi wawo.—Alo. 10:14.
5. Ana buku ja Nahumu jikutulimbikasya catuli?
5 Patukuŵalanga buku ja Nahumu, tukusayiwona kuti Nahumu ŵakulupililaga mnope kuti maloŵe ga Yehofa gakusakwanilicika ndaŵi syosope. M’yoyo, patukuŵandicila mbesi ja cilambo ca Satanaci, kwende tujembeceyeje kwanilicikwa kwa Maloŵe ga Mlungu gakuti, “Ngasipapagwasoni yipwetesi.”—Nah. 1:9.