Yaka 100 Yakulalicila ya Ucimwene!
1. Ana ŵandu ŵa Yehofa ŵalimbikasisye kutenda cici ciŵandika yaka 100 yipiteyo?
1 “Alole, Mwenye akulamulila! Jemanja ali ŵakulalicila ya jwalakwejo. M’yoyo, alalicile, alalicile, alalicile, yakwamba Mwenye ni ucimwene wakwe.” Gelega gali maloŵe gaŵaŵecete M’bale Rutherford yaka ciŵandika 100 yipiteyo. Maloŵega galimbikasisye ŵandu ŵa Yehofa kulalicila ya Ucimwene pa cilambo cosope. M’wejisoni gakusatulimbikasya! Mpela Aklistu ŵandanda, m’wejisoni tulalicile ngani syambone syakwamba ya Ucimwene kwa “ŵandu ŵapacilambo cosope capasi.” (Akolo. 1:23) Pa yaka 100 yipiteyi, ana tutesile yatuli pakulalicila ya Ucimwene wa Mlungu? Payikwanile yaka 100 Ucimwene uli mkulamulila, ana tukusosekwa kutenda yatuli kuti tujendelecele kulalicila ya Ucimwene?
2. Ana mabuku getu gaŵele gali mkusala yatuli pakwamba ya Ucimwene wa Mlungu?
2 Kulola Munyuma: Kwa yaka yejinji, mabuku getu gaŵele gali mkusala ya Ucimwene wa Mlungu. Kutyocela m’caka ca 1939 magasini jetu jakumanyikwa mnope jikusakola mtwe wakuti: Nsanja ya Olonda Yolengeza Ufumu wa Yehova. Maloŵega gakusagopolela kuti magasiniji jikusasala ya Ucimwene wa Yehofa. Magasiniji mnopemnope jikusasala ya Ucimwene, soni yawucikwanilisya. Magasini ja Galamukani! jikusasalasoni yakwamba Ucimwene wa Mlungu kuti ni wawucimasya yakusawusya yosope ya ŵandu. Ni ligongo lyakwe magasini gaŵiliga gali gakumanyika mnope pacilambo cosope!—Ciu. 14:6.
3. Ana tuŵele tuli mkamulicisya masengo matala gapi pakulalicila ya Ucimwene?
3 Ŵandu ŵa Yehofa aŵele ali mkukamulicisya masengo matala gakulekanganalekangana pakulalicila ya Ucimwene. Kalakalako, twakamulicisyaga masengo magalimoto gakulalicilila, twagulusyaga ngani pa wayilesi, soni twaŵaga ni ngani syejambule. Matalaga gaŵele gali mkutukamucisya kulalicila ngani syambone kwa ŵandu ŵajinji pandaŵi jele ŵakulalicila ya Ucimwene ŵaliji ŵamnono. (Sal. 19:4) M’yaka yacapangakaŵapa, tuŵele tuli mkamulicisya masengo webusayiti jetu jajikusatukamucisya kulalicila ya Ucimwene kwa ŵandu ŵejinji, atamose kwa ŵandu ŵali m’yilambo yele masengo getu akusagakanya.
4. Ana pacangakaŵapa tutandite kamulicisya masengo matala gapi gasambano pakulalicila?
4 Ŵandu ŵa Yehofa atanditesoni kamulicisya masengo matala gasambano pakulalicila ya Ucimwene. Mwambone, kutandila m’yaka ya m’ma 1990, pakonjecesya kulalicila kunyumba ni nyumba, tuŵelesoni tuli mkulalicila mwamtawu kumalo kwakusakungulucila ŵandu, kwakwimika magalimoto, soni kumalo gakutendela malonda. Pacangakaŵapa, tutandite kulalicila pelanguka m’misinda jekulungwa pacilambo cosope. Nambosoni mipingo jejinji jikusalalicila m’mikuli jakumangwawo pakamulicisya masengo tumashelefu, soni tumatebulo twakusaŵika mumbali mwa misewu jekulungwa. Nambope, litala lyakulalicila kunyumba ni nyumba lilipe litala lyekulungwa mnope lyakulalicilila ya Ucimwene.—Masengo 20:20.
5. Ana tucikola upile watuli pakutanda kwa caka ca undumetume casambano?
5 Kulola Msogolo: M’mwesi wa September, pakutanda pa caka ca undumetume casambano, ŵandu ŵajinji cacitanda upayiniya wakutamilicika. Ana cacitanda nawo? Naga ngasakombola kutenda, ana cacilembesyaga upayiniya wakamucisya ndaŵi ni katema? Cinga cacikombola kutenda nawo upayiniya kapena iyayi, Yehofa caciyijaliwa yiliyose yacacitenda pakulalicila ya Ucimwene.—Mal. 3:10.
6. Ana ligongo cici mwesi wa October uciŵa wapajika?
6 Pakwikana mwesi wa October m’caka ca 2014, paciŵa pali papite yaka 100 cipagwile Ucimwene. Ni ligongo lyakwe Nsanja ya Olonda ja mwesi welewo jicisala mnope ya Ucimwene wa Mlungu. Wuli ngalinganya yakuti ciŵagaŵile ŵandu ŵajinji magasini jeleji? Patukwembeceya yindu ya msogolo, kwende ‘tulalicileje Ngani Syambone syakusala ya Ucimwene wa Mlungu’ kwa wosope ŵakusaka kupikana.—Masengo 8:12.