Kongolela Katende Ketu ka Undumetume—Yampaka Aŵecete Pakusaka Kutendela Umboni Mwaupile

Ligongo Cici Kuli Kwakusosekwa: Ndaŵi sine patukulalicila kunyumba ni nyumba ngatukusasimana ŵandu. Nambo ŵandu ŵelaŵa komboleka kusimana nawo m’basi, kucipatala, kumsika, kumasengo kapena kusukulu, soni ku malo gane. Lili lisosa lya Yehofa kuti ŵandu mpela ŵelewa apate upile ŵakupikana nawo utenga wa Ucimwene. (1 Tim. 2:3, 4) Kuti tutande kwalalicila, ndaŵi syejinji tukusasosekwa kuti m’weji tutandisye kuŵecetana.

Mwampaka Tutendele:

Asaguleje cenene. Ana mundujo akuwoneka kuti ali jwakungulucika? Ana malo galigo gali gambone kuŵecetanilana ni mundu mwagopoka? Ŵakulalicila ŵane akusatanda kaje kumlola mundu kaneko akusam’mwemwetelaga. Naga mundujo akumwemwetelasoni akusatanda kuŵecetana.
Naga akutenda woga kutanda kuŵeceta, apopeleje mwakata camumtima.—Neh. 2:4; Mase. 4:29
Komboleka kutanda ni maloŵe gakata mpela kupeleka moni. Yesu paŵaŵecetanaga ni jwamkongwe jwacisamaliya jula nganatandila kuŵeceta ya Ucimwene. (Yoh. 4:7) Ndaŵi sine mpaka atande ni kuyamicila. Mwine komboleka kutanda ni kuti: “Ŵanace ŵawoŵa akwete ndamo syambone kwabasi!” Yiwusyo yilisoni mbali jimo jakutandila kuŵecetana. Mwambone, mpaka ajile kuti, “Ana apikene ngani jakutesya canasa jajisasile liso pa wayilesi?”
Patandite kunguluka ni mundu aloleje lipesa lyakuŵecetela ngani syambone, nambo akasajanguyaga. Ajendelecele kunguluka najo mpaka ayiwone kuti kuli kwakomboleka kumlalicila. Kapena komboleka kusala cinecakwe cakutesya lung’wanu campaka cimtendekasye kuwusya ciwusyo. Mwambone, naga yakuŵecetanayo yili yakwamba liŵasa, komboleka kuŵeceta kuti, “Mbatile cinecakwe campaka cakamucisye kwalela ŵanace ŵawo mwakuŵajilwa.” Naga akuŵecetana ya ngani jinejakwe ja mu nyusipepala, mpaka aŵecete kuti, “Mbalasileje ngani jinejakwe jambone jajikutagulila mwayicisindila yindu.” Akasatenguka naga yakuŵecetanayo yikumalila petala m’kanatendele umboni.
Ajigaleje tumapepala kapena mabuku gane gampaka ampe mundu jwakwete lung’wanu.

Alinje Kutenda Yakuyicisyayi Mwesi Awuno:

Cijuma cilicose alinje kamulicisya masengo cimo mwa yindu yatutagulileneyi kuti atendele umboni mwaupile.