Mwesi wa August Ciwuciŵa Wangaliŵalicika!

1. Patukusangalala kuti Ucimwene wa Mlungu sampano ciwukwanisye yaka100, ana tucikamula masengo gapajika gapi pacilambo cosope?

¹ Patukusangalala kuti Ucimwene wa Mlungu sampano ciwukwanisye yaka 100 uli mkulamulila, yiciŵa yakusosekwa kumlumba Yehofa pakamula nawo masego gapajika! M’mwesi wa August tucikamulanawo masengo ga pacilambo cosope gagaŵila kapepala kamtwe wakuti, Ana Kwanga kwa Yiwusyo Yakusosekwa Mnope Mpaka Tukupate Kwapi? Kapepalaka kacakamucisya ŵandu kupata kwanga kwa yiwusyo yakwamba Baibulo, soni kumanyilila mwampaka webusayiti jetu ja jw.org jakamucisye.

2. Ana tucitenda yatuli mwesi wa August kuti ‘tumlumbe Yehofa mwagumila’?

² Tucimlumba Yehofa Mwagumila: Pakusaka kwakamucisya ŵakulalicila konjecesya undumetume wawo, tulinganyisye yakuti jwalijose jwakusaka kutenda upayiniya wakamucisya cakombolece kutenda nawo m’mwesi wa August. Ŵacacitenda upayiniya wakamucisya m’mwesi welewu cacikomboleka kupeleka maawala 30. Pakuŵa mwesi wa August ukwete masiku msano ga Lyamsano, Lyakuŵeluka, soni Lyamlungu, ŵakulalicila ŵajinji ŵakukamula masengo, kapena ŵapasukulu cacikomboleka kutenda nawo upayiniya wakamucisyawu. Naga akwete jwakulijiganya Baibulo jwakwawula pasogolo, kapena mwanace jwakusaka kuŵa jwakulalicila jwangabatiswa, aŵecetane ni jwakamulanya masengo ga likuga mwacitemacitama. Yiciŵa yakusangalasya mnope kwawona jemanjaji ali mkulalicila nawo mkati mwa mwesi wapajikawu! Atamose kuti apayiniya ŵakutamilicika akusapumula m’mwesi wa August ali akwanilisye maawala gawo ga pacaka, yili yakomboleka kucenga ndandanda jawo kuti cakole lipesa lyakutenda yejinji mu ndaŵi ja cakutendekwa capajikaci. Sambano ndaŵi jili jambone jakuti maŵasa gatagulilane mwacacitendela pakusaka “kumlumba Yehofa mwagumila” m’mwesi wa August.—Ezara 3:11; Miy. 15:22.

3. Ana tukwete cikulupi catuli pa masengo gapajika gagacipagwa m’mwesi wa August?

³ Atamose kuti tuŵele mkukamula masengo gati gelega munyumamu, tukukulupilila kuti masengo ga mu August gaciŵa gangaliŵalicika. Ana mwine tucikomboleka kupata ciŵalanjo capenani mnope ca maawala, ŵakulalicila, soni ca apayiniya ŵakamucisya m’mwesi wa August? Patukumalisya caka ca undumetume ca 2014, tukwete cikulupi cakuti Yehofa caciyijaliwa yakulingalinga yetu yakusaka kamula nawo masengo gakulalicila gangaliŵalicika gagacipagwa m’mwesi wa August!—Mat. 24:14.