Aŵeje Ŵakusunga Ndaŵi
1. Ana Yehofa atupele cisyasyo catuli pangani jakusunga ndaŵi?
1 Yehofa akusatenda yindu pandaŵi jakwe. Mwambone, jwalakwe akusiŵakamucisya ŵakutumicila ŵakwe pandawi ‘jakusosecela cikamucisyo.’ (Ahe. 4:16) Jwalakwe akusiŵagaŵila ‘yakulya yausimu mu ndaŵi jakwe.’ (Mat. 24:45) M’yoyo, tukwete cikulupi cosope kuti lisiku lya Yehofa tiliciyika mu ndaŵi jakwe, “ngasilikokoŵa”. (Hab. 2:3) Ŵanduwe yindu yikusatujendela cenene ligongo Yehofa akusasungaga ndaŵi. (Sal. 70:5) Nambo ligongo lyakututupila yakutenda, soni ligongo lya ungali unama yikusaŵa yakusawusya kwa ŵanduwe kuti tusunjeje ndaŵi. Ana ligongo cici tukusosekwa kulingalinga kuti tusunjeje ndaŵi?
2. Ana kusunga ndaŵi kukusacimbicisya catuli Yehofa?
2 M’masiku gambesiga ŵandu ali ŵakulinonyela, soni ŵangalitimalika. Yeleyi yikusatendekasya kuti akasungaga ndaŵi. (2 Tim. 3:1-3) M’yoyo, patukusunga ndaŵi pakwawula kumasengo gakucilu, kumisongano, patulangene ni mundu jwine, ŵandu akusayiwonaga yeleyi, soni yikusacimbicisya Yehofa. (1 Pet. 2:12) Ana tukusayika kumasengo gakucilu pandaŵi jakwe, nambo ni kuceleŵaga ku yakutendekwa yausimu? Patukuyika ndaŵi jambone kumisongano ni kwimba nawo nyimbo jandanda, soni kupikanila lipopelo, tukusalosya kuti tuli ŵakusacilila kwasyasya Atati ŵetu ŵakwinani ŵakusatenda yindu mwakulongosoka.— 1 Akoli. 14:33, 40.
3. Ana kusunga ndaŵi kukusalosya catuli kuti tukusiŵaganicisya ŵane?
3 Patukusunga ndaŵi tukusalosya kuti tukusiŵacimbicisya ŵane. (Afil. 2:3, 4) Mwambone, patukwawula kumisongano jaciklistu pandaŵi jambone, kupwatikapo kumsongano wakosecela undumetume wa mumgunda, yikusatendekasya kuti tukasokonasya ŵakulupilila acimjetu. Nambo naga cisyoŵe cetu cili cakokoŵa, yikusatendekasya ŵane ganisya kuti ndaŵi jetu jili jakusosekwa mnope kupunda jawo. Patukusunga ndaŵi tukusalosya kuti tuli ŵakulupicika, ŵakulipeleka, soni ŵaganicisya ŵane. Ŵandu akusanonyela mundu jwakwete ndamo mpela syelesi.
4. Naga tukwete cisyoŵe cakokoŵa, ana mpaka tutende cici kuti tusinde?
4 Naga akwete cisyoŵe cakokoŵa, akusosekwa ganicisya yayikusatendekasya. Alinganyeje cenene yindu yakusaka kutenda kuti ayimalisyeje pandaŵi jakwe. (Mla. 3:1; Afil. 1:10) Apopeleje kwa Yehofa kuti ŵakamucisye. (1 Yoh. 5:14) Kuŵa ŵakusunga ndaŵi kuli litala limo lyakulosya kuti tukusapikanila malamusi gaŵili gekulungwa, gagali kumnonyela Mlungu, soni kumnonyela mjenu.—Mat. 22:37-39..