Ajitendekasye Ndaŵi ja Cikumbucilo Jino Kuŵa Jakusangalasya!

1. Ana litala limo lyakonjecesya kusangalala kwetu pa ndaŵi ja Cikumbucilo lili lyapi?

¹ Ana akusaka konjecesya kusangalala kwawo m’miyesi ja March, April, soni May? Litala limo lyakutendela yeleyi lili konjecesya undumetume wawo, soni naga yili yakomboleka kutenda upayiniya wakamucisya. Ana yeleyi mpaka yijonjecesye catuli kusangalala kwawo?

2. Ana konjecesya undumetume wetu kukusajonjecesya catuli kusangalala?

² Ajonjecesye Kusangalala Kwawo: Yehofa ŵatupanganyisye m’litala lyakuti tusangalaleje, soni tujikutileje patukumlambila, patukupatasoni yakulajila yetu yausimu. (Mat. 5:3) Jwalakwe ŵatupanganyisyesoni mu litala lyakuti tusangalaleje patukwapa ŵane yindu. (Mase. 20:35) Undumetume ukusatukamucisya kutenda yosope yiŵiliyi, kulambila Mlungu, soni kwakamucisya ŵandu. M’yoyo kutenda nawo yejinji mu undumetume kukusakamucisya kuti tuŵe ŵakusangalala kwejinji. Konjecesya pelepa, patukulalicila mnope ni patukusamanyilila cenene kalalicile kambone. Patukumanyilila cenene kalalicile kambone tukusaŵa ŵakulimba mtima, soni tukusanandiyaga ndetemu. Tucikola mapesa gamajinji gakutendela umboni, soni gakutandikasya majiganyo ga Baibulo. Yosopeyi yikusatendekasya undumetume kuŵa wakusangalasya.

3. Ligongo cici miyesi ja March ni April jili jambone mnope kutenda upayiniya wakamucisya?

³ Miyesi ja March ni April jiciŵa jambone mnope kutenda upayiniya wakamucisya ligongo mpaka tusagule kutenda upayiniya wa ma awala 30 kapena 50. Konjecesya pelepa, kutandila Lyakuŵeluka lya pa March 22, mpaka pa lisiku lya Cikumbucilo, Lyakulemba pa April 14, tucisangalala pakamula nawo masengo gakuŵilanjila ŵandu ku Cikumbucilo. Mipingo jicisangalala mnope ligongo ŵajinji cacikamulaga masengo “mwakamulana” kuti ayicile mkuli wekulungwa pandaŵi japegwile.—Zef. 3:9.

4. Naga tukusaka kutenda upayiniya, ana tukusosekwa kutenda cici?

⁴ Atande Apano Kosecela: Naga nganatande kosecela, akusosekwa kulolasoni mwayiŵelele yindu pa umi wawo ni kucenga yine ni yine kuti ajonjecesye undumetume wawo mwesi umo kapena kupunda. Ajipopelele nganiji. (Yak. 1:5) Aŵecetane yeleyi ni ŵa mwiŵasa mwawo, soni ŵane mumpingo. (Miy. 15:22) Wawojo kombolekasoni kusangalala ni upayiniya wakamucisya atamose ali ngakusimana cenene m’cilu mwawo kapena akusakamula masengo gangapa lipesa.

5. Ana paciŵa yakuyicisya yatuli naga tukonjecesya undumetume wetu pa ndaŵi ja Cikumbuciloji?

⁵ Yehofa akusasaka kuti ŵakumtumicila aŵe ŵakusangalala. (Sal. 32:11) Naga tukulipeleka kutenda yejinji mu undumetume wetu pa ndaŵi ja Cikumbucilo jino, ngatujonjecesya kusangalala kwetupe nambosoni Atati ŵetu ŵakwinani cacisangalala.—Miy. 23:24; 27:11.