Akuyeje Cisyasyo ca Ŵakulocesya—Mika
1. Ana Mika komboleka kuti ŵaganicisyaga ciwusyo catuli, nambo ana kulalicila kwakwe kwakwanilicikwe catuli?
1 ‘Ana mbesi ja ukoto wa yindu wakusakalawu jiciyika cakaci?’ Jwakulocesya Mika kombolekasoni kuti ŵaganisisye ciwusyo celeci paŵalalicilaga ya utenga wa Yehofa wakwamba konasika kwa ucimwene wa Isalayeli ni wa Yuda. Yaŵalalicilaga yakwanilicikwe. Mu 740 B.C.E., Mika ali cijumi, maloŵe ga Yehofa gakwamba konasika kwa Samaliya gakwanilicikwe. (Mika 1:6, 7) Kaneko, m’caka ca 607 B.C.E. msinda wa Yelusalemu wajonanjikwe. (Mika 3:12) Ana lelo jino, mpaka tukuyeje catuli cisyasyo ca Mika patukwembeceya lisiku lyakwelusya lya Yehofa?
2. Ana tukusalosya catuli kuti tuli ŵakuwusimana mtima patukwembeceya lisiku lya Yehofa, soni ligongo cici?
2 Aŵeje Ŵakuwusimana Mtima: Mika ŵalembile kuti: “Nambo une, cinjimjembeceya Yehofa, cinjilosya mtima wakwembeceya kwa Mlungu jwa cikulupusyo cangu.” (Mika. 7:7) Mika nganagamba kutama pakwembeceya kwika kwa mbesi. Jwalakwe ŵakamulaga masengo mnope mpela jwakulocesya jwa Yehofa. M’wejisoni patukwembeceya lisiku lya Yehofa, tukusosekwa ‘tuŵeje ŵaswela soni tukoleje yitendo ya kulipeleka kwa Mlungu.’ (2 Pet. 3:11, 12) Kuwusimana mtima kwa Yehofa kukwapa ŵandu upile wakuti apitikuce mitima. (2 Pet. 3:9) M’yoyo, kwende tukuyeje maloŵe ga Mlungu gakuti tusyasyeje cisyasyo ca ŵakulocesya cakuŵa ŵakuwusimana mtima.—Yak. 5:10.
3. Ligongo cici tukusosekwa kuŵenda msimu weswela wa Yehofa?
3 Ajegamileje Macili ga Yehofa: Atamose kuti masengo ga Mika galiji gakusawusya, ŵajegamilaga Yehofa kuti ampe macili kuti atende cenene masengogo. (Mika 3:8) Yehofa akusamanyilila kuti tukusasosecela macili gakwe, ni ligongo lyakwe Baibulo jikusatulimbikasya kuŵenda macili ga Mlungu. Jwalakwe akusiŵapa macili mwakoloŵa magasa ŵandu ŵakupela kuti akwanilisye undumetume wawo. (Sal. 84:5, 7; Yes. 40:28-31) Ana pakwete payatendecele yeleyi mu undumetume wawo? Ana ndaŵi ni katema, akusam’ŵendaga Yehofa kuti ŵakamucisye ni macili gakwe ga msimu weswela?—Luka 11:13.
4. Ana umi wa Mika ukutupa cisyasyo cambone catuli lelo jino?
4 Umi wakwe wosope, Mika ŵakuwonaga kutenda lisosa lya Yehofa kuŵa kwakusosekwa mnope pa umi wakwe. Atamose kuti jwasyungulilwe ni ŵandu ŵangalumbana, jwalakwe ŵajendelecele kuŵa jwakulupicika. M’wejisoni, tukusasimana ni yakulingwa lisiku lililyose. M’yoyo, kwende tusimicisye “kwenda mu lina lya Yehofa Mlungu jwetu kwangamala.”—Mika 4:5.