Ana Mlungu Ali Ŵani?

Ŵandu ŵajinji akusasalaga kuti akusamkulupilila Mlungu. Nambo ali ŵawusisye kuti, ana Mlungu ali ŵani? Akusajanga mwakulekanganalekangana. Ŵane akusati Mlungu akusalamulila mwangasa soni akusagambaga kwapa ŵandu chilango pa yakulemwa yatesile. Ŵanesoni akusakulupilila kuti Mlungu ali kutali soni jwangasamalaga ya ŵandu. Nambope ŵane akusati Mlungu ali jwachinonyelo soni jwakululuka, mwangasamala kandu ya yindu yakusatendaga jemanjajo. Ligongo lya kulekangana nganisyo kweleku, ŵajinji akusayiwona kuti yangakomboleka kummanyilila Mlungu.

Ana kummanyilila Mlungu kwana umbone uliwose? Elo, umbone upali. Kummanyilila chenene Mlungu mpaka kutukamuchisye kumanyilila chakulinga cha umi wetu. (Masengo 17:26-28) Pakumŵandichila Mlungu, jwalakwe chachanonyela soni kwakamuchisya. (Yakobo 4:8) Kummanyilila chenene Mlungu kuchakamuchisya kuti chapate umi wangamala.—Yohane 17:3.

Ana mpaka ammanyilile Mlungu chamti uli? Aganichisye ya mundu jwakusammanyilila mnope jwali mjawo jusyesyene. Ana yatandite chamti uli kuti aŵe mjawo? Mwangakayichila ŵatandite ni kummanyilila lina, umundu wakwe, yindu yakusayinonyela, yindu yaŵele ali mkutenda, yakusasaka ali atesile soni yine yejinji. Kummanyilila chenene jwalakwe kwakamuchisye kuti aŵe mjawo.

Mwakulandana ni yeleyi, mpaka tummanyilile Mlungu mwakuganichisya yiwusyo ayi:

• ANA MLUNGU LINA LYAKWE ŴANI?

• ANA MLUNGU AKWETE NDAMO SYAPI?

• ANA MLUNGU ATESILE YINDU YAPI?

• ANA MLUNGU CHACHITENDA YINDU YAPI?

• ANA KUMMANYILILA MLUNGU KULI KWAKAMUCHISYA CHAMTI ULI KWA WAWOJO?

Magasiniji ajilinganyisye kuti jakamuchisye kupata kwanga kwa yiwusyoyi kutyochela m’Baibulo. Ngani syasili m’magasiniji chisyakamuchisye kulola umbone wampaka apate ligongo lyakuŵa paunasi ni Mlungu, ngaŵa kwamba kummanyililape.