Ana Akumanyilila?

Ana jwakulijiganya Sitefano jwakombwele camtuli kwendelecela kuŵa jwakuwusimana mtima pandaŵi jaŵasimene ni yilagasyo?

SITEFANO jwasimene ni likuga lya ŵandu ŵakusisya. Luŵala lwekulungwa lwa magambo lwa Ayuda, lwakwete acalume ŵakulamula ŵakwana 71. Jemanjaji ŵaliji m’likuga lya ŵandu ŵamacili mnope m’cilamboci. Acalumeŵa ŵasongene mu luŵala lwa magambolu mwakulongoleledwa ni Jwamkulungwa Jwambopesi lina lyakwe Kayafa, jwele jwalongolelesoni pa magambo ga Yesu gakuti awulajidwe. (Mat. 26:57, 59; Mase. 6:8-12) Jemanjaji paŵamŵilangaga mundu jumo jumo kukupelecela umboni waunami wakwamba Sitefano, cindu cakusimonjesya catendekwe. Ngope ja Sitefano jatandite kuwoneka “mpela ngope ja lilayika.”—Mase. 6:13-15.

Ana Sitefano jwakombwele camtuli kwendelecela kuŵa jakuwusimana mtima pandaŵi ja cakutendekwa cakusawusya mnopeci? Jwalakwe mkanam’wute kuti akawonecela ku luŵala lwekulungwa lwa magambo lwa Ayuda, Sitefano jwalipelece mnope pa undumetume wakwe mwakulongoleledwa ni msimu wa Mlungu. (Mase. 6:3-7) Pajwasimene ni cakulingwa, msimu wa Mlungu wakamulaga masengo pa jwalakwe mwakumtondoya soni kumkumbusya yindu yaŵalijiganyisye kala. (Yoh. 14:16) Sitefano pajwalicenjelaga mwakulimba mtima mu luŵala lwa magambo lula, mwakamulana ni yayili pa Masengo mtwe 7, msimu wa Mlungu wamkumbwisye malemba gane kutyocela mu m’Malemba ga Cihebeli. (Yoh. 14:26) Nambo cikulupi ca Sitefano cajendelecele kuŵa cakulimba pajwagaweni mesomkulola ga Yesu ali ajimi kumkono wamlyo wa Mlungu.—Mase. 7:54-56, 59, 60.

M’wejisoni mpaka tusimane ni yakogoya soni kutusisya. (Yoh. 15:20) Naga tukukola cisyoŵe cakuŵalanga Maloŵe ga Mlungu soni kulipeleka mnope pamasengo gakulalicila, tucikunda kuti msimu wa Yehofa ukamuleje masengo petuwe. Tucipakombolasoni kupilila pandaŵi jatukusimana ni ŵakutusisya soni tucijendelecela kola mtendele wamumtima.—1 Pet. 4:12-14.