Yiwusyo Yakutyocela Kwa Ŵakuŵalanga

Naga jwamlume ni jwamkongwe jwanganaŵa paulombela agonile cilo cosope m’nyumba jimo pali pangali magongo gakupikanika, ana mpaka asosekwe komiti jakwelusya?

Elo, kugona cilo cosope m’nyumba jimo pali pangali magongo gakupikanika uli umboni wamacili wakulosya kuti ŵanduwo atesile yamsese. Nambo komiti jakwelusya ngaŵa mkutendekwa pali pana magongo gakupikanika.—1 Akoli. 6:18.

Likuga lya acakulungwa ŵa mumpingo likusosekwa kuganicisya cenene kuti lilole naga mpaka pasosekwe komiti jakwelusya. Mwambone, ana ŵanduwo ali pacitomelo? Ana munyumamu pakwete papocele camuko pakwamba ya kakunguluce kawo? Ana cici cacitendekasisye kuti agone nyumba jimo cilo cosope? Ana jaliji pulani? Ana yigambile kutendekwa mwangosi, kapena paliji yakutendekwa yakupikanika yayitendekasisye yeleyo? (Mlal. 9:11) Ana ŵagonile mwamtuli m’nyumbamo? Pakuŵa yakutendekwa yikusalekangana, ndaŵi sine mpaka paŵe magongo gane gakupikanika gakusosekwa kugaganicisya.

Panyuma pakumanyilila yisyesyene yakwe, acakulungwa ŵa mumpingo mpaka alole naga yatesile ŵanduwo yikusosekwa komiti jakwelusya.