“Jwakupeleka Mwakoloŵa Magasa Cacipocela Mbote”

KWA ndaŵi jelewu, kupeleka mbopesi kuŵele mbali jakusosekwa pa kulambila kusyesyene. Ayisalayeli ŵapelekaga mbopesi sya nyama, soni Aklistu akusamanyika mnope kuti ‘akusamlumba’ Mlungu. Kumlumbaku kuli mpela mbopesi. Nambope, panasoni mbopesi sya mtundu wine syele Mlungu akusangalala nasyo mnope. (Ahe. 13:15, 16) Ŵakupeleka mbopesisi akusaŵa ŵakusangalala soni akusapocela majali. Yisyasyo yakuyicisyayi yikulosya yeleyi.

Hana, jwakutumicila jwakulupicika jwa mu ndaŵi jakala, jwasacililaga kola mwanace jwamlume, nambo jwaliji jwangaŵeleka. Mu lipopelo lyakwe, jwalakwe ŵamlagwisye Yehofa kuti naga cacikola mwanace jwamlume, ‘cacimpeleka kwa Yehofa masiku gosope ga umi wakwe.’ (1 Sam. 1:10, 11) Pali papitile ndaŵi, Hana ŵakwete citumbo, mwamti jwaŵelece mwanace jwamlume lina lyakwe Samuyele. Paŵalesile konga, Hana ŵamjigele Samuyele ni kwawula najo ku nyumba jakulambilila, mwakamulana ni yaŵalagwisye yila. Yehofa ŵampele majali Hana ligongo lya koloŵa magasa kwakwe. Jwalakwe ŵakwete upile wakola ŵanace ŵane msano, soni Samuyele jwaŵele jwakulocesya ni jwakulemba Baibulo.—1 Sam. 2:21.

Mwakulandana ni Hana soni Samuyele, Aklistu masiku agano akwete upile wakamulicisya masengo umi wawo pakumtumicila Mkupanganya jwawo. Yesu ŵasasile kuti pa yiliyose yampaka tutende pa kumlambila Yehofa tucipocela mbote.—Maliko 10:28-30.

M’yaka 100 yandanda, Mklistu jwine jwamkongwe lina lyakwe Dolika jwaliji jwakumanyikwa mnope ni ‘masengo gambone soni ŵapelekaga mituka kwa ŵakulaga.’ Syelesi syalijisoni mbopesi. Nambo kaneko, jwalakwe ‘jwalwasile ni jwawile’ mwamti ŵandu mumpingo ŵakwete canasa cekulungwa. Ŵanduwo paŵapikene kuti Petulo ali kwakuŵandika ni kumaloko, ŵamŵendile kuti ayice mwacitema. Paŵakopocele ŵamjimwisye Dolika. Petulo jwaliji jwakumkuya jwa Yesu jwandanda kumjimusya mundu ku ŵawe. Agambe ganicisya mwaŵasangalalile ŵandu pakum’wona Dolika ali ajimwice! (Mase. 9:36-41) Mlungu nganaliŵalila mbopesi sya Dolika. (Ahe. 6:10) Yaŵatesile Dolika pakulosya koloŵa magasa yalembedwe m’Maloŵe ga Mlungu kuti tujigalile cisyasyo cakwe.

Ndumetume Paulo nombenajo jwalosisye cisyasyo cambone pangani jakoloŵa magasa. Jwakamulicisyaga masengo ndaŵi ni umi wakwe pakumtumicila Mlungu. Mu cikalata cakwe cakwawula kwa Aklistu ŵa ku Kolinto jwatite, “Nambo une, cinjikamulicisya masengo yindu yangu yosope soni cinjipeleka umi wangu wosope ligongo lya umi wawo.” (2 Akoli. 12:15) Pa umi wakwe, Paulo ŵamanyilile yakuti naga mundu akupeleka umi wakwe pakwatumicila ŵane akusaŵa jwakusangalala, nambosoni cakusosekwa mnope, Yehofa akusamnonyela soni kumpa majali.—Mase. 20:24, 35.

M’yoyo, Yehofa akusasangalala patukukamulicisya masengo ndaŵi ni macili getu pakukamucisya pa yindu ya Ucimwene, soni kwakamucisya ŵakulupilila acimjetu. Nambo ana panasoni yine yampaka tutende pakukamucisya masengo gakulalicila ya Ucimwene? Elo yipali! Kupwatika pakukamulicisya masengo ndaŵi ni macili getu, tukusosekwa kupeleka yindu yatukwete, mpelaga mbiya, pakulosya kumcimbicisya Mlungu. Yinduyi yikusakamucisya pa masengo gakulalicila gagakutendekwa pacilambo cosope, mwambone, kwakamucisya amishonale ni ŵane ŵakutenda undumetume wandaŵi syosope wapajika. Yikusakamucisyasoni pamasengo gagopolela mabuku ni mafidiyo, kutaŵa Nyumba sya Ucimwene, soni kamucisya kumalo kwakutendekwe ngosi syacipago. Mpaka tuŵe ŵakusimicisya yakuti “mundu jwakupeleka mwakoloŵa magasa cacipocela mbote.” Nambosoni, naga tukupeleka kwa Yehofa yindu yetu ya mtengo wapenani, nikuti tukumcimbicisya.—Miy. 3:9; 11:25.

Yakusasagula Ŵane Kupeleka Pakamucisya Masengo Ga Pacilambo Cosope

Mwakulandana ni mundaŵi ja Paulo, abale ni alongo ŵajinji masiku agano “akusaŵika kanekakwe pambali,” kapena kuti kusunga mbiya ni kuja kuponya m’libokosi lya yakupeleka ku mpingo lyelembe kuti “Masengo ga Pacilambo Cosope.” (1 Akoli. 16:2) Mwesi wuliwose, mpingo ukusatumisya yakupeleka yeleyi ku ofesi ja Mboni sya Yehofa jajikusalolela m’cilamboco. Yili yakombolekasoni kuti mundu atumisye jika yakupeleka yakwe ku ofesiji. Kuti amanyilile mwampaka atendele yeleyi, awusye ku ofesi ja nyambi. Komboleka kupata adilesi ja ku ofesiji pa www.jw.org/yao. Mitundu ja yakupeleka yampaka atumisye jika yili:

YAKUPELEKA YA NDAŴI JIJOJO

Mpaka ŵasalile ŵa kubanki kuti atyose mbiya mu akaunti jawo ni kusitumisya ku akaunti ja ofesi ja nyambi. M’yilambo yine mpaka akombolece kutumisya mbiya kupitila pa jw.org kapena webusayiti jine.
Mpaka apelecesoni mbiya, kapena yindu yine yamtengo wapenani mpela ndolo, yibangili, mbete ni yine. Akusosekwa kutumisya mbiya kapena yinduyo pampepe ni cikalata cakusala kuti yili yakupeleka.

YAKUPELEKA MWAKWASIMISYA

Mpaka apelece mbiya nambo syakuti ciŵawucisye pacacisisakapo.
Akusosekwa kutumisya mbiyasi pampepe ni cikalata cakusala kuti mbiyasyo agambile kwajasima.

MATALA GANE GAKUPELECELA

Konjecesya pa kupeleka mbiya kapena yindu yamtengo wapenani, panasoni matala gane gampaka tupelecele pakamucisya masengo ga Ucimwene ga pacilambo cosope. Matala gakwe agasasile pasipa. Nambope, kanga asagwile litala lyamtuli, akusosekwa candanda kuwusya ku ofesi ja nyambi jajikusalolela masengo gakulalicila m’cilambo cawo kuti ŵasalile matala gagali gakundidwa. Pakuŵa malamusi soni mtengo wa msongo yikusaŵa yakulekanganalekangana mwakamulana ni cilambo, mpaka yiŵe cenene kwawusya kaje ŵandu ŵakusamanyilila ya malamusi soni misongo mkanitusagule litala lyakupelecela.

Inshulansi Soni Peshoni: Mundu mpaka alinganye yakuti ofesi ja nyambi tijipocele mbiya syakwe sya inshulansi kapena sya peshoni.

Maakaunti ga Kubanki: Mwakamulana ni malamusi ga mabanki gakumangwawoko, mpaka apelece akaunti jawo ja kubanki soni yikalata yawo yakusunjicisya mbiya kapena mpaka alinganye yakuti pacaciwapo mbiya syasili ku akaunti jawo cisijawule ku ofesi ja nyambi.

Masheya: Mundu mpaka apelece masheya gakwete mu kampani ku ofesi ja nyambi kapena mpaka alinganye yakuti pacaciwapo masheya gakwe cigajawule ku ofesi ja nyambi.

Malo Kapena Nyumba: Naga mundu akwete malo kapena nyumba yampaka yikombolece kusumisya mpaka apelece ku ofesi ja nyambi. Kombolekasoni kupeleka nyumba kapena malo ni kwendelecelaga kaje kamulicisya masengo pandaŵi jali cijumi.

Cipanje Camasije: Mundu mpaka alembe wilo jakwiticika ni boma ni kusala kuti pacaciwapo ofesi ja nyambi cijijigale cipanje cakwe.

Kuti amanyilile yejinji, ajawule pa jw.org/yao ni kutowanya palembile kuti “Apelece Yakupeleka ku Masengo Getu ga Pacilambo Cosope,” kapena awusye ku ofesi ja nyambi.