“Nganimboceleje Mtuka Wambone Mpela Welewu!”

Msikana jwine jwa yaka 13, jwalipikene m’yoyo paŵapocele mbwa. Jwamkongwe jwine jwakusatenda ya malonda, ŵasasile kuti kompyuta jaŵampele babagwe paŵaliji ku sekondale, waliji mtuka wawacenjile umi wakwe. Jwamlume jwine, jwayamicile mnope kadi jaŵampele ŵamkwakwe pakusangalalila kuti amasile caka ali alombene.

Caka cilicose, ŵandu ŵajinji akusatenda mtawu soni kumalila ndaŵi jawo pakusosasosa mtuka “wambone” wakuti ŵape acimjawo kapena ŵacinasi ŵawo payakutendekwa yapajika. Ŵajinji akusasangalala kumpikana jwapocele mtuka ali mkusala maloŵe gakuyamicila mpela gagali pamtwe wa nganiji. Nambi wuli wawojo? Ana pakwete papelece kapena kupocela mtuka wambone mnope?

Kusala yisyene, mundu jwapelece soni jwapocele mtuka akusalipikana cenene. Konjecesya pelepa, Baibulo jikusasala kuti, “Kupeleka kukusamtendekasya mundu kuŵa jwakusangalala kulekangana ni kupocela.” (Masengo 20:35) Ndaŵi syejinji mundu jwapelece mtuka akusaŵa jwakusangalala naga jwapocelejo awuweni kuti wuli wakusosekwa.

Ana akusosekwa kutenda yamtuli kuti wawojo soni mundu jwapocelejo asangalale ni mtukawo? Soni ana mpaka atende wuli kuti mtuka wuliwose wampaka apelecewo mundu akawuyamicile?