“Masengoga Gali Gekulungwa”

JALIJI ndaŵi ja msongano wakusosekwa mnope ku Yelusalemu. Mwenye Daudi ŵaŵilasile mayimwene, acakulungwa ŵa munganya, ni acalume ŵamacili. Wosopeŵa ŵaliji ŵakusangalala kupikana cimanyisyo capajika. Yehofa ŵamlamwile Solomoni mwanace jwa Daudi kuti ataŵe nyumba japajika mnope jakulambilila Mlungu jwakuwona. Mwenye Daudi ŵaliji ali asalilidwe ni Yehofa mwampaka ataŵile nyumbaji ni ŵamlondecesye Solomoni yeleyo. Daudi ŵasalile ŵanduwo kuti, “Masengoga gali gekulungwa ligongo nyumbaji nganijiŵa ja mundu nambo ja Yehofa Mlungu.”—1 Mbiri 28:1, 2, 6, 11, 12; 29:1.

Kaneko Daudi ŵawusisye ŵanduwo kuti, “Ana ŵani ŵacalipelece lelojino kupeleka mtuka kwa Yehofa?” (1 Mbiri 29:5) Ana yikaŵe kuti wawojo ŵapali pa msongano welewu, nakatesile cici? Ana nakaliji ŵakusacilila kamucisya masengo gamakulungwaga? Ayisalayeli ŵatesilepo kandu mwacitema. M’yoyo, ‘ni mitima jakusengwa . . . ŵapelece yakupeleka yakulisosela kwa Yehofa mwakutyocela pasi pa mtima.’—1 Mbiri 29:9.

Yaka mahandiledi panyumba pakwe, Yehofa ŵatamilikasisye cindu cine capenani mnope kupunda nyumba jakulambililaji. Jwalakwe ŵatamilikasisye nyumba jekulungwa jausimu, jajili dongosolo jakuti ŵandu amlambileje jwalakwejo kupitila mu mbopesi ja Klistu. (Ahe. 9:11, 12) Ana Yehofa akwakamucisya catuli ŵandu masiku agano kuti akamulanesoni ni jwalakwe? Akutenda yeleyi kupitila m’masengo getu gakupanganya ŵakulijiganya. (Mat. 28:19, 20) Yakuyicisya yakwe, caka cilicose tukusatendesya majiganyo ga Baibulo gamajinji, ŵajinji akusabatiswa, soni mipingo jejinji jikusapagwa.

Yeleyi yikugopolela kuti pakusasosekwa kupulinta mabuku gamajinji gakutagulila Baibulo, kutaŵa soni kulinganya Nyumba sya Ucimwene, nambosoni kupata malo gakutendela misongano jekulungwakulungwa. Ana ngakwiticisya kuti masengo getu gakulalicila ngani syambone gali gekulungwa soni gakuyikasya majali?—Mat. 24:14.

Kunonyela Mlungu soni ŵandu nambosoni kulupicika pamasengo gakulalicila ya Ucimwene wa Mlungu, kukwatendekasya ŵandu ŵa Mlungu kuŵa ŵakusacilila ‘kupeleka . . . mtuka kwa Yehofa’ mwakupeleka yakupeleka mwakusaka kwawo. Yili yakusangalasya kumcimbicisya Mlungu ni yindu yetu ya mtengo wapenani soni kulola yakuti kakamulicisye masengo yinduyo mwalunda soni mwakulupicika pa masengo gekulungwa mu mbili ja ŵandu.—Miy. 3:9.

Yakusasagula Ŵane Kupeleka Pakamucisya Masengo Gapacilambo Cosope

Abale ni alongo ŵajinji masiku agano “akusaŵika kanekakwe pambali” kapena kuti kusunga mbiya ni kuja kuponya m’libokosi lya yakupeleka ku mpingo lyelembe kuti “Masengo ga Pacilambo Cosope.” (1 Akoli. 16:2) Mwesi wuliwose, mpingo ukusatumisya yakupeleka yeleyi ku ofesi ja Mboni sya Yehofa jajikusalolela m’cilamboco. Yili yakombolekasoni kuti mundu atumisye jika yakupeleka yakwe ku ofesiji. Kuti amanyilile mwampaka atendele yeleyi, awusye ku ofesi ja nyambi. Komboleka kupata adilesi jakwe pa www.jw.org/yao. Mitundu ja yakupeleka yampaka atumisye jika yili:

YAKUPELEKA YA NDAŴI JIJOJO

Mpaka ŵasalile ŵa kubanki kuti atyose mbiya mu akaunti jawo ni kusitumisya ku akaunti ja ofesi ja nyambi. M’yilambo yine mpaka akombolece kutumisya mbiya kupitila pa jw.org kapena webusayiti jine.
Mpaka apelecesoni mbiya, soni yindu yine yamtengo wapenani mpela ndolo, yibangili, mbete ni yine. Akusosekwa kutumisya mbiya kapena yinduyo pampepe ni cikalata cakusala kuti yili yakupeleka.

YAKUPELEKA MWAKWASIMISYA

Mpaka apelece mbiya nambo syakuti ciŵawucisye pacacisisakapo.
Akusosekwa kutumisya mbiyasi pampepe ni cikalata cakusala kuti mbiyasyo agambile kwajasima.

MATALA GANE GAKUPELECELA

Konjecesya pa kupeleka mbiya kapena yindu yamtengo wapenani, panasoni matala gane gampaka tupelecele pakamucisya masengo ga Ucimwene ga pacilambo cosope. Matala gakwe agasasile pasipa. Nambope, kanga asagwile litala lyatuli, akusosekwa candanda kuwusya ku ofesi ja nyambi jajikusalolela m’cilambo cawo kuti ŵasalile matala gagali gakundidwa. Pakuŵa malamusi soni mtengo wa msongo yikusaŵa yakulekanganalekangana mwakamulana ni cilambo, mpaka yiŵe cenene kwawusya kaje ŵandu ŵakusamanyilila ya malamusi soni misongo mkanitusagule litala lyakupelecela.

Inshulansi: Mundu mpaka alinganye yakuti ofesi ja nyambi tijipocele mbiya syakwe sya inshulansi kapena sya peshoni.

Maakaunti ga Kubanki: Mwakamulana ni malamusi ga mabanki gakumangwawoko, mpaka apelece akaunti jawo ja kubanki soni yikalata yawo yakusunjicisya mbiya kapena mpaka alinganye yakuti pacaciwapo mbiya syasili ku akaunti jawo cisijawule ku ofesi ja nyambi.

Masheya: Mundu mpaka apelece masheya gakwete mu kampani ku ofesi ja nyambi kapena mpaka alinganye yakuti pacaciwapo masheya gakwe cigajawule ku ofesi ja nyambi.

Malo Kapena Nyumba: Naga mundu akwete malo kapena nyumba yampaka yikombolece kusumisya mpaka apelece ku ofesi ja nyambi. Kombolekasoni kupeleka nyumba kapena malo ni kwendelecelaga kaje kamulicisya masengo pandaŵi jali cijumi.

Cipanje Camasije: Mundu mpaka alembe wilo jakwiticika ni boma ni kusala kuti pacaciwapo ofesi ja nyambi cijijigale cipanje cakwe.

Kuti amanyilile yejinji, ajawule pa jw.org/yao ni kutowanya palembile kuti “Apelece Yakupeleka ku Masengo Getu ga Pacilambo Cosope,” kapena awusye ku ofesi ja nyambi.