Paulo ni Timoteyo

Timoteyo jwaliji m’bale jwacinyamata mumpingo wa Lusitala. Babagwe ŵaliji Mgiliki, nambo mamagwe ŵaliji Myuda. Mamagwe lina lyawo lyaliji Yunisi, soni lya angangagwe lyaliji Loisi. Jemanjaji wamjiganyisye Timoteyo yakwamba Yehofa kutandila paŵaliji mwanace.

Paulo ali apite ku Lusitala paulendo wakwe waŵili wakulalicila, jwayiweni kuti Timoteyo jwanonyelaga abale soni jwaliji jwakusacilila kwakamucisya. Paulo ŵam’ŵendile Timoteyo kuti ajendeje najo yalumo pamaulendo gakwe. Kwandaŵi jelewu, Paulo ŵamjiganyisye Timoteyo kuti aŵe jwakulalicila soni mkwiganya jwambone jwa utenga wambone.

Msimu weswela waliji mkwalongolela mwanja Paulo ni Timoteyo kulikose kuŵajawulaga. Cilo cine, Paulo ŵagaweni mesomkulola. M’mesomkulolago, jwalakwe ŵam’weni mundu ali mkumsalila Paulo kuti ajawule ku Makedoniya kukwakamucisya. M’yoyo Paulo, Timoteyo, Sila soni Luka ŵajawile kweleko kukulalicila soni kutamilikasya mipingo.

Mumsinda wa Tesalonika ku Makedoniya, acalume ni acakongwe ŵajinji ŵaŵele Aklistu. Nambo Ayuda ŵane ŵamtendelaga jelasi Paulo yalumo ni acimjakwe ŵala. Ayudaŵa ŵatendekasisye kuti ŵandu ŵakutumbila ŵajigalile abaleŵa kwa ŵakulamulila ŵa mumsinda. Ŵanduŵa ŵaliji mgumila kuti, ‘Acalumeŵa ali acimmagongo ŵa boma ja Loma!’ Umi wa Paulo ni Timoteyo waliji pangosi mwamti pasikati cilo, ŵatilile ku Beleya.

Ŵandu ŵa ku Beleya ŵaliji ŵakusacilila kulijiganya utenga wambone, mwamti Agiliki ni Ayuda ŵaŵele ŵakulupilila. Nambo Ayuda ŵane ŵatyocele ku Tesalonika ni kutandisya njojo, mwamti Paulo ŵatilile ku Atene. Timoteyo ni Sila ŵasigele ku Beleya peko kuti ŵalimbikasye abale. Mkupita kwa ndaŵi Paulo ŵamtumisyesoni Timoteyo ku Tesalonika kukwakamucisya abale yampaka atende ni ngalwe syakogoya syaŵatendelaga Aklistu. Kaneko, Paulo ŵamtumile Timoteyo kuti ajendele mipingo jejinji ni kujilimbikasya.

Paulo ŵamsalile Timoteyo kuti, ‘Ŵandu ŵakusaka kumtumicila Yehofa cacilagasidwa.’ Timoteyo ŵalagasidwe soni ŵam’ŵisile m’nyumba ja ukayidi ligongo lya cikulupi cakwe. Jwalakwe jwaliji jwakusangalala ligongo lyakola upile wakulosya kuti ali jwakulupicika kwa Yehofa.

Paulo ŵasalile Afilipi kuti, ‘Ngumtumisya Timoteyo kwa jemanja. Jwalakwe camjiganye yampaka mtendeje mpela ŵakutumicila ŵa Yehofa, soni camjiganye yampaka mtendeje pamli mu undumetume.’ Paulo jwayimanyi kuti Timoteyo ali mundu jwampaka jwalakwe amjegamile. Jemanjaji ŵatumicile Yehofa yimpepe kwa yaka yejinji.