Koneliyo Akupocela Msimu Weswela

Ku Kaisaleya, kwaliji mundu jwine juŵaliji jwamkulungwa jwa asilikali ŵa Aloma. Lina lyakwe lyaliji Koneliyo. Jwalakwe nganaŵa m’Yuda, nambo Ayuda ŵamcimbicisyaga. Jwalakwe jwakamucisyaga ŵandu ŵakulaga mwakoloŵa magasa. Jwakulupililaga Yehofa soni jwapopelaga kwa jwalakwe ndaŵi syosope. Lisiku line, lilayika lyam’wonecele Koneliyo, ni lyatite, ‘Mlungu apikene mapopelo genu. Sambano mtumisye acalume ku msinda wa Yopa, kwakusatama Petulo, kuti akam’ŵende jwalakwe kuti ayice kumangwenu kuno.’ Mwangacelewa, Koneliyo ŵatumisye acalume ŵatatu ku Yopa. Msinda wa Yopa waliji pa lutando lwa makilomita 50 kwinjililaga ca kummwela kwa Kaisaleya.

Pandaŵi jeleji, nombe nako ku Yopa, Petulo jwagaweni mesomkulola. Jwalakwe jwayiweni yinyama yele Ayuda nganasosekwaga kulya, ni jwapikene maloŵe gakumsalila kuti alye yinyamayo. Nambo Petulo jwakanile kuti, ‘Une nganindyeje yinyama yangaswejela paumi wangu.’ Ni jwapikene maloŵe gakuti, ‘Mkayikolanga yinyamayi kuti yili yangaswejela, ligongo Mlungu ayiswejesye.’ Kaneko jwapikenesoni maloŵe gakuti, ‘Pana acalume ŵatatu pamlango wa nyumba jenu. Mlongane ni jamanjajo.’ Kaneko Petulo jwapite pamlango pala ni jwawusisye acalumewo caŵayicile kumangwakweko. Ni jemanjajo ŵatite, ‘Atutumile Koneliyo, jwamkulungwa jwa asilikali ŵa Ciloma. Akuti mmwejo mjawule kumangwakwe ku Kaisaleya.’ Petulo jwaŵendile ŵanduwo kuti agone kumangwakweko. Lisiku lyakuyicisya, jwalakwe yalumo ni abale ŵane ŵa ku Yopa ŵalongene ni ŵanduwo kwawula ku Kaisaleya.

Nambo Koneliyo paŵagambile kum’wona Petulo, jwamtindiŵalile. Nambo Petulo jwatite, ‘Mjimuce! Ndili mundu mpela mmwejo. Mlungu ni jwasalile kuti yice kumangwenu kuno, atamose kuti Ayuda ŵangajawula m’milango ja ŵandu ŵa mitundu jine. Sambano musalile, ligongo cici mumbilasile?’

Koneliyo ŵamsalile Petulo kuti, ‘Masiku mcece gapitega mbopesileje kwa Mlungu, ni lilayika lyasalile kuti namsose mmwejo. Conde mtujiganye maloŵe ga Yehofa.’ Ni Petulo jwatite, ‘Nayimanyi kuti Mlungu jwangali lusagu. Jwalakwe akusampocela jwalijose jwakusaka kumlambila.’ M’yoyo Petulo jwajiganyisye yindu yejinji yakwamba Yesu. Kaneko msimu weswela wam’yicile Koneliyo ni ŵandu ŵaŵaliji najo yalumo, ni wosopewo ŵabatiswe.