Citenti Cakulambilila

Mose paŵaliji petumbi lya Sinayi, Yehofa ŵamsalile kuti ataŵe citenti cakulambilila. Citentici caliji cakuti Ayisalayeli acikamulicisyeje masengo pakulambila. Caliji cakuti ŵakombolaga kucinyakula pakwenda.

Yehofa ŵatite, ‘Ayisalayeli kuti apelece yindu yampaka akombole kuti yikamucisye pakutaŵa citenti cakulambilila.’ Ni jemanjajo ŵapelece golide, silifa, kopa, maganga gapepani soni yindu yine yamtengo wapenani. Ŵapelecesoni manyunya, nguwo, mapende ga yinyama, soni yindu yine yejinji. Ayisalayeliŵa ŵapelece yindu yejinji mwamti Mose ŵasalile kuti, ‘Yikwanile, akayikasoni ni yindu yine.’

Acalume soni acakongwe ŵajinji ŵakamucisyaga nawo masengo gakutaŵa malo gakulambililago. Yehofa ŵapele ŵanduŵa lunda lwakwakamucisya kamula masengogo. Ŵane ŵapanganyaga ulusi, kuluka nguwo, soni ŵane ŵapetaga nguwosyo. Ŵane ŵasalalisyaga nguwosyo pakamulicisya masengo maganga. Ŵane ŵapanganyaga yindu pakamulicisya masengo golidi, soni ŵane ŵasepaga yitela.

Ŵanduwo ŵataŵile citenti cakulambililaco mwakamulana ni yaŵatite Yehofa pakwasalila. Ŵalingenyesoni nguwo jakusalala jajagaŵanyaga citentico yipinda yiŵili, Cipinda Ceswela soni Ceswela Mnope. M’cipinda Ceswela Mnope ni muŵaŵikaga libokosi lya cilangano. Libokosili ŵalipanganyisye pakamulicisya masengo matabwa ga kesha soni golidi. M’cipinda Ceswela mwaliji yakwimicila nyali ya golidi, tebulo, soni malo gakutinicisya ubani. Paluŵala lwa citenti cakulambililaci paliji libeseni lya kopa soni ŵataŵile malo gekulungwa gakupelecela mbopesi. Libokosi lya cilangano lyakamucisyaga Ayisalayeli kumbucila cilanga cawo cakumpikanila Yehofa. Ana mkumanyilila gopolela kwa maloŵe gakuti cilanga? Cili kusimicisya mwapajika kuti cimtende yindu yine yakwe.

Yehofa ŵamsagwile Aloni soni ŵanace ŵakwe ŵacalume kuti akamuleje masengo mpela ŵambopesi pa citenti jakulambilila. Masengo gawo galiji gakusamalila citentici soni kupeleka mbopesi kwa Yehofa. Aloni jwajwaliji jwamkulungwa jwa ŵambopesi ni jwaŵasosekwagwa kwinjila ku cipinda Ceswela Mnope. Jwajinjilaga ku cipindaci kampepe pacaka kukupeleka mbopesi ja yakulemwa yakwe, ya liŵasa lyakwe soni yakulemwa ya mtundu wosope wa Ayisalayeli.

Ayisalayeli ŵamalisisye kutaŵa citentico pali pamasile caka cimo cityocele ku Iguputo. Sambano jemanjaji ŵakwete malo gakumlambilila Yehofa.

Yehofa ŵalosisye kuti ŵasangalalaga ni citenti cakulambililaco soni ŵatendekasyaga kuti liwunde liwoneceleje penani pakwe. Naga liwundelyo lili penani pacitentipo, Ayisalayeliwo ŵasosekwaga kutama pamalo gelego. Nambo naga liwundelyo litandite kwenda nombe jemanjajo ŵamanyililaga kuti jili ndaŵi jakunyakuka. Jemanjaji ŵacigopolaga citentico ni kucijigala kaneko ŵalikuyaga liwundelyo.