Panyasa Jecejewu Patendekwe Cakusimonjesya

Falao paŵagambile kupikana kuti Ayisalayeli atyosile ku Iguputo, jwacenjilesoni nganisyo. Jwalakwe ŵalamwile asilikali ŵakwe kuti, ‘Ajigale yida yangu yangondo yosope, ni kwende twawutucile. Jemanjaji ngakusosekwa kuti ajawuleje.’ Falao pamo ni asilikaliwo ŵatandite kwawutusya Ayisalayeli.

Musi, Yehofa ŵalongolelaga ŵandu ŵakwe pakamulicisya masengo liwunde, nambo cilo ŵakamulicisyaga masengo moto. Jwalakwe ŵalongolele ku Nyasa Jecejewu ni ŵasalile kuti ataŵe masakasa.

Kaneko Ayisalayeliwo ŵam’weni Falao pamo ni asilikali ŵakwe ali mkwawutucila. Jemanjaji nganakola mbali jakutilila ligongo mbali jine kwaliji nyasa soni mbali jineji kwaliji asilikali ŵa Aiguputo. Ŵatandite kumlilila Mose acitiji, ‘Basi lelo cituwe! Mkagambile kutuleka ku Iguputo kulakula.’ Nambo Mose jwatite, ‘Mkasimtenda woga. Jembeceyani kuti mlole yacajile Yehofa pakutukulupusya.’ Mose jwamkulupililaga Yehofa, ngati m’yoyo?

Yehofa ŵasalile Ayisalayeliwo kuti apasulanye masakasa gawogo. Cilo calisikuli, Yehofa ŵaŵisile liwunde sikati ja Aiguputo ni Ayisalayeli. Mbali ja Aiguputowo kwaliji cipi nambo mbali ja Ayisalayeli kwaliji lilanguka.

Yehofa ŵamsalile Mose kuti atambasukulile mkono wakwe panyasapo. Yehofa ŵatendekasisye cimbungo camacili kupuga cilo cosope. Kaneko nyasajo jagaŵikene, ni pasikati pakwe paŵele litala. M’yoyo, Ayisalayeli ŵajesile pasikati pa mapupa ga mesi kwawula lisi line lya nyasajo.

Asilikali ŵa Falao ŵatandite kwakuya Ayisalayeliwo kupitila pasikati pa nyasajo. Kaneko Yehofa ŵasokonasisye asilikaliwo. Yitungulu kapena kuti matayala ga magaleta gawo gatandite kukulika. Mwamti asilikaliwo ŵatandite kugumila kuti, ‘Kwende tutile! Yehofa akwaputila ngondo jemanjaji.’

Yehofa ŵamsalilesoni Mose kuti, ‘Mtambasukulile mkono wenu panyasapo.’ Pa ŵagambile kutenda yeleyo, mesi gala gawujilesoni asilikali ŵa Aiguputo ali pasikati pa nyasajo. Falao pamo ni asilikali ŵakwe ŵawile. Pangali atamose jumo juŵakulupwice.

Ayisalayeli ali ajombwece nyasajo ŵatandite kumlumba Mlungu mwakwimba nyimbo. Jemanjaji ŵajimbaga kuti, “Amjimbile Yehofa ligongo jwalakwe ali jwapenani mnope. Mahaci ni ŵakwelapo ŵakwe ŵaponyisye m’nyasa.” Ŵandu paŵajimbaga nyimboji, acakongwe ŵaŵinaga soni kwimba tugoma. Jwalijose jwaliji jwakusangalala ligongo jwamanyililaga kuti sambano ali pa ufulu.