Mose Jwasagwile Kumlambila Yehofa

Ku Iguputo, liŵasa lya Yakobo lyamanyikaga kuti Ayisalayeli. Panyuma pakuti Yakobo ni Yosefe awile, Falao jwasambano jwatandite kulamulila. Jwalakwe ŵajogopaga Ayisalayeli kuti caŵe ŵamacili mnope kupunda ŵandu ŵa ku Iguputo. Falao jweleju jwatesile Ayisalayeli kuŵa acikapolo. Jwalakwe ŵakanganicisyaga jemanjajo kamula masengo gagumba njelwa soni kamula masengo gakupweteka ga kumigunda. Nambo Aiguputo paŵakanganicisyaga Ayisalayeli kamula masengo mnope, ciŵalanjilo ca Ayisalayeliwo ni pacatupaga mnope. Ligongo lyakuti Falao nganasakaga yeleyi, jwalamwile kuti mwanace julijose jwamlume jwakupagwa mwa Ayisalayeli awulajidwe. Mgambe ganicisya woga wuwakamwile Ayisalayeliŵa.

Jwamkongwe jwaciyisalayeli lina lyakwe Yokebedi ŵakwete mwanace jwamlume jwakusalala. Pakusaka kumkulupusya jwalakwe, ŵam’ŵisile m’citundu ni ŵamsisile m’matete gagaliji m’Lusulo lwa Nayilo. Mlumbugwe mwanacejo, Miliyamu, jwatamaga ciŵandika citundu kuti aloleje yaciyitendekwe.

Lisiku line, mwanace jwamkongwe jwa Falao jwayice kulusuloko kukoga ni ŵaciweni citundu. Ali aciwugwile citunduco ŵamsimene mwanace ali mkulila, ni jwamtendele canasa. Kaneko Miliyamu ŵawusisye kuti, ‘Ana mpaka njawule ngasosele jwamkongwe jwampaka amsamalile mwanaceju?’ Mwanace jwa Falao paŵajiticisye, Miliyamu jwapite kuja kukwajigala mamagwe ŵasyesyene. Mwanace jwa Falaojo ŵamsalile jwamkongwejo kuti, ‘Mumjigale mwanaceju kuti mkasamalile, ni cinjimlipila.’

Paŵakusile Mwanacejo, Yokebedi ŵamjigalile ni kuja kukumpeleka kwa mwanace jwamkongwe jwa Falao. Kweleko ŵamkolasile kuti Mose nambosoni ŵamlelaga mpela mwanace jwakwe. Mose ŵakusile mpela mwanace jwa mwenye nambosoni ŵapataga cilicose cakusaka. Nambo Mose nganamliŵalila Yehofa. Ŵamanyililaga kuti ali Mwisalayeli jusyesyene, ngaŵa Mwiguputo. Ni jwalakwe ŵasagwile kumtumicila Yehofa.

Mose ali akwete yaka 40, ŵasagwile kamucisya ŵandu ŵakwe. Paŵam’weni Mwiguputo ali kumputa Mwisalayeli, jwalakwe ŵamputile mnope mwiguputojo mpaka jwawile. Mose ŵasisile mtembo mu msanga. Falao paŵamanyilile yeleyi, ŵasakaga kum’wulaga Mose. Nambo Mose ŵatilile ku cilambo ca Midiyani. Yehofa ŵamsamalilaga kweleko.