Ŵaŵelece Mwanace Ali Acekulwipe!

Abulahamu ni Sala ŵaliji ali atemi paulombela kwa yaka yejinji. Jemanjaji ŵalesile malo gawo gambone ku Uli ni ŵatandite kutama mu tenti. Nambo Sala nganadandawulaga ligongo ŵamkulupililaga Yehofa.

Sala ŵamsakaga mwanace mnope mwamti ŵamsalile Abulahamu kuti, ‘Naga jwakutumicila jwangu Hagala akola mwanace, mwanacejo juciŵa mpela jwa une.’ Mkupita kwa ndaŵi, Hagala ŵaŵelece mwanace jwamlume. Lina lyakwe lyaliji Isimayeli.

Pali papitile yaka yejinji, Abulahamu ali akwete yaka 99 nambosoni Sala ali akwete yaka 89, ŵapocele acalendo ŵatatu. Abulahamu ŵaŵilanjile acalendowo pasi pacitela ni kulya nawo yakulya yimpepe. Ana mkumanyilila kuti acalendowo ŵaliji ŵani? Galiji malayika! Malayikago gamsalile Abulahamu kuti, ‘Caka ca malaŵi ndaŵi mpela jinojino, mmwejo ni ŵamkwenu cimcikola mwanace jwamlume.’ Sala jwapikanilaga yeleyi ali mkati mwa tenti. Jwalakwe jwasecile jika ni jwaganisisye kuti, ‘Ana yisyene kuti une mpaka ngole mwanace mungulilemu?’

Caka cakuyicisyaco, Sala ŵakwete mwanace jwamlume, mpela mwele malayika ga Yehofa gamlagucisye. Abulahamu ŵampele mwanacejo lina lyakuti Isaki, lyalikusagopolela kuti, “Kuseka.”

Isaki ali akwete yaka 5, Sala ŵam’weni Isimayeli ali kumnyosya. Sala pakusaka kumteteya mwanagwejo ŵapite kwa Abulahamu ni kuja kuŵenda kuti Hagala ni Isimayeli atyoce panyumbapo. Pandanda, Abulahamu nganasakaga kutenda yeleyo. Nambo Yehofa ŵasakagasoni kumteteya Isaki ni ŵamsalile Abulahamu kuti, ‘Mumpikanile Sala. Cinjimsamalila Isimayeli. Nambo yinalagucisye yicikwanilicikwa kupitila mwa Isaki.’