Mlungu Ŵapanganyisye Kwinani Soni Cilambo Capasi

Yehofa Mlungu ni juŵatupanganyisye. Jwalakwe ŵapanganyisye yindu yosope yakuwoneka ni yangawoneka yakwe. Mkanapanganye yindu yampaka tuyiwone, jwalakwe ŵapanganyisye malayika gejinji. Ana mkugamanyilila malayika? Gali yakupanganyikwa ya Yehofa yakulandana ni jwalakwejo. Nganituŵa tugaweni, mpela mwayiŵelelesoni ni Mlungu kuti ngatukusam’wona. Lilayika lyandanda liŵalipanganyisye Yehofa lyaliji mkumkamucisya jwalakwejo. Lilayikali lyamkamucisye Yehofa paŵapanganyaga ndondwa, mapulaneti, soni yindu yine yosope. Jimo mwa mapulanetiga jili cilambo capasi cakusalalaci.

Kaneko Yehofa ŵacilinganyisye cilamboci kuti yinyama soni ŵandu atamejemo. Jwalakwe ŵatesile yakuti kuŵala kwa lyuŵa kuyicileje pacilambo. Jwapanganyisye matumbi, nyasa ni sulo.

Ana kaneko Yehofa ŵapanganyisye cici? Jwalakwe ŵatite, ‘Ngusaka kupanganya yakumela.’ M’yoyo, pacilambo patandite kumela yitela ya yisogosi yakulekanganalekangana soni maluŵa. Kaneko Yehofa ŵapanganyisye yinyama yosope, yaguluka, yang’ambila soni yakwaŵa. Jwalakwe ŵapanganyisyesoni yinyama yamwanamwana mpela kalunga, soni yekulungwakulungwa mpela ndembo. Ana ni cinyama capi camkusacinonyela?

Kaneko Yehofa ŵalisalile lilayika lyandanda lila kuti, “Kwende tupanganye mundu.” Yehofa ŵapanganyisye ŵandu mwakulekangana ni yinyama. Ŵaliji ŵakuti cacipakombolaga kupanganya yindu, kuŵecetana, kuseka soni kupopela. ŵasosekwagasoni kusamalila cilambo soni yinyama. Ana mkummanyilila mundu jwandanda kupanganyidwa? Kwende tulole.