CIWUSYO 5

Ana Mpaka Ndende Wuli Ŵane Pakundagasya Kusukulu?

UMBONE WAKUMANYILILA YELEYI

Yampaka atende ŵane pakwalagasya mpaka yitendekasye yindu kusawusya kapena iyayi.

**ANA WAWOJO MPAKA ATENDE YATULI?**

Aganicisye ayi: Tujile kuti Thomas ngakusaka kwawula ku sukulu lelo. Soni akusaka kwamba kuleka kwene. Akusaka kutenda yeleyi ligongo lyakuti miyesi jitatu jipitejo acimjakwe ŵa ku sukulu ŵawandisye ngani jaunami jakwamba ya jwalakwejo. Soni ŵatandite kumkolanga mena gacipongwe. Acimjakweŵa ndaŵi sine ŵamjasikasyaga mabuku, nambo pangope yawonekaga mpela atesile mwangosi. Ndaŵi sine pekuga ŵamtwangaga suŵa, jwalakwe pagalawuka nganammanyililaga jwamtwanjile. Liso peli, mundu jwine ŵamtumicisye Thomas utenga wakumjogoya.

Yikaŵe kuti wawojo ali Thomas, ana akatesile yatuli?

AJIME NI AGANICISYE!

Ngaŵa kuti pangali campaka atende! Mpaka akombole kwagomeka ŵakwalagasya mwangamenyana nawo. Ana mpaka atende catuli yeleyi?

AKAJANGAGA CILICOSE. Baibulo jikusati, ‘Cisilu cikusalosya kutumbila kwakwe kosope, nambo mundu jwalunda akusawusimana mtima.’ (Miyambo 29:11) Naga ngakwajanga cilicose, ŵakwalagasyawo mpaka agambe kwaleka.
AKAWUCISYAGA. Baibulo jikusati, ‘Akawucisyaga cakusakala pa cakusakala.’ (Aloma 12:17) Kuwucisya mpaka kugambe kwisilila yakusawusya.
AKALIJINJISYAGA MELEPE MU YAKUSAWUSYA. Baibulo jikusati, “Jwakalamuka pati aciweni cakogoya akusajuŵaga.” (Miyambo 22:3) Naga yili yakomboleka, ŵaŵambaleje ŵandu ŵakusanonyela kwalagasya acimjawo.
ATENDEJE YINDU YAKUTI JEMANJAJO NGANAYIJEMBECEYAGA. Baibulo jikusati, ‘Kwanga mwakuwusimana mtima kukusanandiya kutumbila.’ (Miyambo 15:1) Ndaŵi sine mpaka agambeje kuŵeceta kapena kutenda yakwasekasya ŵakusaka kwalagasyawo. Mwacisyasyo, naga jwine akwagamba kuti ajimbele mnope, wawojo mpaka amjanje kuti, “Kumbila kwimbalakutu kwele!”
KWAMBA KUTYOKAPO. Nora, msikana jwa yaka 19 ŵatite, “Kwamba kutyoka ngaŵeceta cilicose kukusalosya kuti mli jwakumanyilila yindu kupunda jwakwalagasyajo. Yikusalosya kuti mli jwakuwusimana mtima.”—2 Timoteo 2:24.
AKALIKAYICILAGA. Ŵandu ŵakwalagasya acimjawo akusanonyela kwalagasya ŵandu ŵakulikayicila ligongo akusaganisya kuti nganaŵa ŵawucisye. Nambo naga akwawona kuti ali ŵakulimba mtima, jemanjaŵa mpaka alece kwalagasyako.
AKASALEJE KWA ŴANE. Mticala jwine juŵapumwile pamasengo gakwe ŵatite, “Jwalijose jwakulagasidwa ni ŵane ngusinamlimbikasya kuti akasaleje. Kutenda yeleyi kuli kwakamucisya, soni mpaka yitendekasye kuti ŵandu alece kwalagasya.”

Mnyamata akulosya kulimba mtima pameso pa mundu jwakunonyela kwalagasya acimjakwe — Kulimba mtima mpaka kwakamucisye kuti ŵandu alece kwalagasya

**ANA AKUGANISYA WULI?**
YISYENE KAPENA YAUNAMI?	KWANGA
1 Kwalagasya ŵane kwatandile kalakala.	1 Yisyene. Mwacisyasyo, Baibulo jikusatagulila ya ŵandu ŵakolanjikwa Anefili. Linali likusagopolela “Ŵakwagwisya Acimjawo.”—Genesis 6:4.
2 Kwalagasya ŵane nganikuŵa kwakogoya.	2 Yaunami. Ndamoji jitendekasisye ŵandu ŵajinji ŵakulagasidwa kuliwulaga.
3 Kuti ŵandu alece kwalagasya, ŵawucisyeje.	3 Yaunami. Ndaŵi syejinji ŵakwalagasya acimjawo akusaŵa ŵamacili, mwati ŵakulagasidwaŵa nganaŵa akombwele kulimbana nawo.
4 Naga am’weni jwine ali mkulagasidwa, agambeje kuyileka.	4 Yaunami. Naga akwamba kulolela ŵane pakulagasidwa ngatenda cilicose, nikuti yikwanonyela. Mwati pelepa akusaŵa mpela jwakwisilila.
5 Ŵane mwa ŵandu ŵakwalagasya acimjawo akusalikayicila.	5 Yisyene. Atamose kuti ŵakwalagasya acimjawo akusalipikana mnope, nambo ŵajinji akusaliwona kuti ali ŵangali mate mwati akusasaka ŵane alipikanejesoni m’yoyo.
6 Ŵakwalagasya acimjawo komboleka kuleka.	6 Yisyene. Ŵakwalagasya ŵane mpaka alece naga ŵakamucisye.