Yiwundo ya Ucimwene​—Kusosasosa Cilungamo ca Mlungu

AWANICISYE kuti akupita ciŵandika nyumba ja mjawo jwaŵandikene najo, ni akum’bayibisya. Kaneko wawojo ayikopocele kuti mundujo aŵele ali mkusaka kumanyilila ya umi wawo soni wa liŵasa lyawo. Nombe najo akwabayibisya soni kaneko akwaŵilanga ni mkono. Jwalakwe akuti, “Ana mpaka mbusye nawo? Ana ni cici cacikusicatendekasya jemanja kuŵa ŵakulekangana ni ŵane?” Ni wawojo akumwusya mundujo kuti, “Akugopolela cici?” Jwalakwe akuti, “jemanja ali Ŵamboni, ngati m’yoyo? Ngakusatenda yindu mpela mwakusatendela ŵane. Akusatenda yindu yakulekangana ni dini sine. Ngakusasangalalila maholide, kwinjilila yandale soni ngondo. Jemanja ngakusakwemba sona. Maŵasa gawo gakusajendela yiwundo yapenani yandamo syambone. Ana ni cici cacikusicatendekasya kulekangana ni ŵandu ŵane mu yindu yosopeyi?”

Wawojo akumanyilila kuti cacikusatendekasya kulekanganaku cili cindu cimo. Tuli pasi pa ulamusi wa Ucimwene wa Mlungu. Yesu mpela Mwenye akusatuswejesya. Akusatukamucisya kuti tujendeje mwakuya sajo syakwe soni kuti tuŵe ŵakulekangana ni cilambo cakusakalaci. Mu mbali ajino, citulole yawutesile Ucimwene wa Umesiya pakwaswejesya ŵandu ŵa Mlungu mwausimu, mundamo, soni mpela likuga pakusaka kuti Yehofa acimbicikwe.