Kulalicila ya Ucimwene​—Kuwandisya Ngani Syambone Pacilambo Cosope

TUWANICISYE kuti akukosecela yakwawula mu undumetume kundaŵi palisiku lyakusapumula kwawula kumasengo. Nambo akugwa ulesi ligongo lyakulipikana mpela apesile. Kwa wawojo kundaŵiku kukuwoneka kuŵa kwambone kupumula. Nambo akupopela, kaneko akusimicisya yakwawula mu undumetume. Mu undumetumemo akwenda yalumo ni mlongo jwakulupicika jwacikulile. Wawojo akutenda lung’wanu ni kupilila soni umbone mtima wakwe. Pakulalicila usyesyene kunyumba ni nyumba, akukumbucila kuti abale ni alongo pacilambo cosope akukamulasoni masengoga pakamulicisya masengo mabuku gakugakamulicisya masengo wawojo, soni kuti majiganyo gakulandana gaŵapocele gakwakamucisya wosope. Payice kunyumba akusangalala ligongo lyakuti ŵajinjile mu undumetume.

Masiku agano, masengo gakusosekwa mnope mu Ucimwene wa Mlungu gali kulalicila. Yesu jwasasile mkanipaŵe kuti masengo gakulalicila gaciŵa gamakulungwa mnope m’masiku gambesi. (Mat. 24:14) Ana cakulocesyaci cikwanilicikwe mwamtuli? Mu mbali ajino citulole yaŵele ali mkutenda ŵandu, matala gaŵele ali mkugakamulicisya masengo, soni yida yayiŵele yakusosekwa mnope pamasengo gakulalicilaga. Yindu yeleyi yikwakamucisya ŵandu ŵajinji pacilambo cosope kuti awuwoneje Ucimwene wa Mlungu kuŵa usyesyene.