Yelemiya Nganaleka Kuŵeceta ya Yehofa

Ndaŵi sine ŵandu akusatusekaga kapena kututumbilila patukwasalila ya Yehofa. Yeleyi mpaka yitutendekasye kusaka kuleka kuŵeceta ya Mlungu. Ana pakwete payamtendecele yeleyi?— Baibulo jikusatusalila ya mcanda jwine juŵamnonyelaga Yehofa nambo ŵasigele panandi kuleka kuŵeceta ya Yehofa. Lina lyakwe lyaliji Yelemiya. Kwende tulole yejinji yakwamba jwalakweju.

Yelemiya paŵaliji mcanda, Yehofa ŵamsalile kuti akakalamusye ŵandu kuti alece kutenda yakusakala. Yeleyi yaliji yakusawusya kwa Yelemiya, soni jwalakwe ŵakwete woga. M’yoyo ŵamsalile Yehofa kuti: ‘Ngangumanyilila yacingaŵecete pakuŵa ndili mwanace.’ Nambo Yehofa ŵamsalile kuti: ‘Mkatenda woga. Cinamkamucisye.’

M’yoyo, Yelemiya ŵatandite kwakalamusya ŵanduwo kuti naga ngakucenga cacipocela cilango. Ana mkuganisya kuti ŵandu ŵapikanile yaŵasalile Yelemiya?— Iyayi. Jemanjajo ŵamsekaga, soni ŵamtumbilile. Ŵane ŵayikene pakusaka kum’wulaga! Ana mkuganisya kuti Yelemiya ŵapikene wuli mumtima mwakwe?— Jwalakwe ŵakwete woga ni jwatite: ‘Ngasimbecetasoni ya Yehofa.’ Nambo ana jwalakwe ŵalesile kuŵeceta ya Yehofa?— Iyayi, nganaleka. Yelemiya ŵamnonyelaga mnope Yehofa mwati ngamkanaleka kuŵeceta ya jwalakwe. Soni ligongo lyakuti nganaleka kuŵeceta ya Yehofa, Yehofajo ŵamkamucisye.

Mwambone, ndaŵi jine acalume ŵakusakala ŵamponyisye Yelemiya mwisimbo mumwaliji matope gejinji. Acalumeŵa ŵasacile kuti Yelemiya awe ni sala mwisimbomo pakuŵa jwalakwe nganakola cakulya, soni atamose mesi. Nambo Yehofa ŵamkamucisye kuti akulupuce!

Ana mpaka mlijiganye cici pacisyasyo ca Yelemiya?— Atamose kuti ndaŵi sine ŵatendaga woga, Yelemiya nganaleka kuŵeceta ya Yehofa. Pamkuŵeceta ya Yehofa, ŵandu komboleka kumseka kapena kumtumbilila. Mpaka mtendeje sooni kapena woga. Nambo mkaleka kuŵeceta ya Yehofa. Jwalakwe cacimkamucisya ndaŵi syosope, mpela muŵatendele ni Yelemiya.