Cikalata Cakutyocela Ku Likuga Lyakulongolela

Kwa Abale ni Alongo Ŵetu Ŵakunonyelwa:

Mu Sanja ja Mlonda jagaŵila ja January 1, 2008, mwatandite kusimanikwa ngani syakutesya lung’wanu sya mtwe wakuti, “Asyasyeje Cikulupi Cawo.” Yili yakusangalasya kuti kutandila pandaŵiji, panyuma pa miyesi jitatu jilijose paŵele mkukopoka ngani syasambano kutyocela pa mtwewu.

Ana ŵane paŵaŵalasile nganisi ŵaŵecete yatuli? Jwamkongwe jwine paŵamalisisye kuŵalanga ngani jajasalaga ya Malita jwalembile kuti; “Panaŵalangaga, nasekaga ligongo lyakuti yaŵatendaga Malita yikusalandana ni yangusatenda. Ndaŵi syosope ngusasaka kuŵa mundu jwakwapocela cenene acalendo, nambo yikusambijikanila mnope mwati ndaŵi sine ngusaliŵalila kuleka kaje yangutendayo kuti ngunguluce ni acimjangu.” Msikana jwine panyuma pakuŵalanga ngani ja Esitele, ŵaŵecete yindu yakusangalasya kuti: “Nguyiwona kuti ndaŵi sine mpaka tugambeje kujigalika ni yakuwala soni yindu yasambano yayiyice pamsika. Yili yisyene kuti tukusasosekwa kulisalalisya mwakuŵajilwa, nambo tukapelenganyaga malile.” Jwalakwe jwaŵecetesoni kuti: “Yehofa akusalola mnope ya mumtima.” Soni ngani jine jajasalaga yakwamba ndumetume Petulo jamtendekasisye mlongo jwine jwaciklistu kuŵeceta kuti: “Nganiji jangamwile mtima mnope, yaliji mpela kuti naliji papopo, soni nguyiwona yindu yosope yanaŵalangagayo.”

Yaŵaŵecete jemanjaji soni ŵane ŵajinji yakuyamicila nganisi, yikwamba kusimicisya yaŵalembile Paulo kuti: “Yindu yosope yayalembedwe kala, yalembedwe kuti yitukamucisye.” (Alo. 15:4) Yehofa jwalembile nganisi m’Baibulo kuti atujiganye yindu yakusosekwa mnope. Mundu jwalijose mpaka alijiganye kutyocela kwa jemanjaji mwangajigalila yaka yatemi mu usyesyene.

Tukwalimbikasya kujiŵalanga bukuji. Ajikamulicisyeje masengo pa Kulambila kwa Peŵasa, soni ŵanace ŵawo cacijinonyela. Naga kumpingo atandite kujikamulicisya masengo pa Lijiganyo lya Baibulo lya Mpingo, asimanikweje cijuma cilicose. Ajiŵalanje mwangawutuka. Aganicisyeje yakuŵalangayo, soni aloleje munganisyo mwawo yayikutendekwawo. Aganicisyeje mwaŵapikanilaga soni muŵayiwonelaga yindu ŵandu ŵa m’Baibuloŵa. Aganicisyesoni mwaŵatendele yindu mu yakutendekwa yine kaneko, aliwusye kuti, ‘ana unejo ngatesile wuli payakutendekwa mpela yeleyi?’

Tuli ŵakusangalala mnope kwagaŵila bukuji. Tukulupilila kuti cijakamucisye wawojo ni liŵasa lyawo. Tukusitwanonyela soni kwasosela yambone yosope,

Likuga Lyakulongolela lya Mboni sya Yehofa