Ana Cacitenda Lisosa Lya Yehofa?

Sikomo kwejinji ligongo lyakuŵalanga kabukuka kuti ŵamanyilile cenene ŵandu ŵa Mboni sya Yehofa, kuti amanyilile yatukusatenda, soni kakamule masengo ka likuga lyetu. Tukukulupilila kuti yeleyi yakamucisye kutumanyilila kuti tuli ŵandu ŵakutenda lisosa lya Yehofa lelo jino. Tukwalimbikasya kuti ajendelecele kulijiganya ya Mlungu, kwasalila yakulijiganya ŵa mwiŵasa mwawo ni acimjawo wosope. Tukwalimbikasyasoni kuti ayice tusonganeje yimpepe pamisongano jetu.​—Ahebeli 10:23-25.

Pakulijiganya mnope ya Yehofa, caciyiwona kuti akusiŵanonyela mnope. M’yoyo caciŵa ŵakusacilila kutenda yiliyose yampaka akombole pakulosya cinonyelo cawo kwa Mlungu. (1 Yohane 4:8-10, 19) Nambo ana mpaka alosye catuli kusacilila kweleku pa umi wawo lisiku lililyose? Ligongo cici kupikanila malamusi gakwe kuli kwakwakamucisya wawojo? Soni ana cici campaka cakamucisye kusaka kutenda lisosa lya Mlungu yimpepe ni m’weji? Mundu jwakusiŵajiganya Baibulo cacisangalala kwatagulila kuti wawojo ni ŵa mwiŵasa mwawo ‘aligoseje mu unonyelo wa Mlungu, . . . kuti akapate umi wangamala.’​—Yuda 21.

Tukwaŵenda mwacinonyelo kuti ajendelecele kwawula paujo mu usyesyene mwakulijiganya buku jakuti Ajendelecele Kuŵa M’cinonyelo ca Mlungu