LIJIGANYO 10

Ana Kulambila kwa Peŵasa Kuli Cici?

Liŵasa likusangalala ni kulambila kwa peŵasa — South Korea

Jwamlume ni Jwamkongwe ŵalombane akulijiganya Baibulo yalumo — Brazil

Jwamboni sya Yehofa akulijiganya Baibulo — Australia

Liŵasa likutagulilana ngani sya m’Baibulo — Guinea

Kutandila ni kala kose, Yehofa aŵele ali mkusaka kuti liŵasa lililyose lipateje ndaŵi jakutamila pampepe, kuti lilimbikasye unasi ni jwalakwe, soni unasi wa paliŵasapo uŵe wakulimba. (Deuteronomo 6:6, 7) Ni ligongo lyakwe ŵa Mboni sya Yehofa akusalinganya ndaŵi jine mlungu uliwose kuti atendeje kulambila kwa peŵasa. Kweleku kuli kutagulilana yindu yausimu yakamulana ni yayikusosekwa paliŵasapo, ali atemi mwagopoka. Cinga akutama jika, komboleka kujikamulicisya masengo ndaŵiji kwa Mlungu mwakuŵajilwa. Komboleka kulijiganyaga Baibulo mwakulisagulila ngani syakusaka.

Jili ndaŵi jakum’ŵandicila Yehofa. “Mwaŵandicile Mlungu, nipo jwalakwe tambandicile ŵanganyamwe.” (Yakobo 4:8) Tukusammanyilila cenene Yehofa patukulijiganya yakwamba umundu, soni yitendo yakwe kupitila m’Baibulo. Litala lyangasawusya lyakutandila kulambila kwa peŵasa lili kuŵalanga Baibulo mwakwesya maloŵe yimpepe, mwine mwakuya ndandanda ja mu Sukulu ja Undumetume wa Mlungu. Komboleka kumgaŵila jwalijose mwiŵasamo ndime syakuti aŵalanje, kaneko nikutagulilana yaŵalijigenye.

Jili ndaŵi jakulimbikasya unasi wapaliŵasapo. Acalume ni aciŵamkwawo, soni acinangolo ni ŵanace, akusalimbikasya unasi ŵawo pakulijiganya Baibulo yimpepe mpela liŵasa. Jikusosekwa kuŵa ndaŵi jakusangalasya, ja bata soni jwalijose akoleje lung’wanu lwakutenda mlungu wuliwose. Mwakamulana ni misingu ja ŵanace ŵawo, acinangolo mpaka asagule ngani syakamucisya syakutagulilana, mwine komboleka kamulicisya masengo ngani sya mu Nsanja ya Olonda soni Galamukani! Komboleka kutagulilana cakusawusya cakusimana naco ŵanace kusukulu, soni ya mpaka atende pakumalana naco. Kombolekasoni kulijiganyaga kwimba nyimbo syacakajimbe kumisongano, soni kulya twine twakwe pamalisisye kulambila kwa peŵasako.

Ndaŵi japajika jakulambilila Yehofa mlungu uliwoseji, jicikamucisya wosope ŵa muliŵasalyo kusangalalaga ni kulijiganya Baibulo, soni Yehofa cacapa majali mnope ligongo lya mtawu wawo.—Masalimo 1:1-3.

Ligongo cici tutendeje Kulambila kwa peŵasa?
Ana acinangolo mpaka atende cici kuti ndaŵi jeleji jiŵeje jakusyangalasya kwa wosope mu liŵasamo?