Yesu Ali Cijumi!

LISIKU lyatatu Yesu ali awile, acakongwe ŵatatu ŵaŵaliji ŵakumkuya ŵakwe ŵayiweni kuti liganga lyaŵawugalile pakwinjilila mwilembe, ŵane ŵalityosisye. Soni mwilembemo mwaliji mwangali kandu!

Malayika gaŵili gawonecele. Lilayika limo lyaŵecete kuti, “mkumsosa Yesu jwa ku Nasaleti, . . . ajimwice ku ŵawe.” (Maliko 16:6) Mwangacelewa, acakongweŵa ŵawutwice kukwasalila ŵandumetume ŵakwe. Ali mkwawula, ŵasimene ni Yesu. Jwalakwe ŵasalile kuti “Kasimjogopa, mjawule mkasalile acalongo ajangu kuti ajawule ku Galilaya, ni kweleko takambone.”—Matayo 28:10.

Panyuma pakwe lisiku lilyolyo, ŵakulijiganya ŵakwe ŵaŵili ŵajawulaga ku Emawo kutyocela ku Yelusalemu. Mundu jwine jwacilendo ŵayice nikwendaga nawo yimpepe ni ŵawusisye kuti asale yaŵaŵecetanaga. Munduju ŵaliji Yesu juŵajimwice ku ŵawe, juŵawonecele kwa jemanjajo nambo nganammanyilila. Ali ŵacanasa ŵamjanjile kuti ŵaŵecetanaga pakwamba ya Yesu. Mundu jwacilendo jula ŵatandite kwatagulila yindu yagasasile Malemba gosope pakwamba ya Masiya. Yesu ŵaliji ali akwanilisye yakulocesya yosope pakwamba ya Masiya.a Ŵakulijiganyawo paŵamanyilile kuti mundu jwacilendo jula ŵaliji Yesu, juŵajimwice ku ŵawe mpela msimu, jwalakwe nganawonekasoni.

Ŵakulijiganya ŵaŵiliwo ndaŵi jijojo ŵawujile ku Yelusalemu. Kweleko ŵasimene ŵandumetume ŵala ali aliwugalile m’nyumba. Ŵakulijiganya ŵaŵiliŵa paŵatagulilaga yaŵasimene nayo, Yesu ŵawonecele. Ŵakulijiganyawo yasimonjesye mnope yeleyi, soni nganakulupilila ata panandi! Yesu ŵawusisye kuti, “Ana mkusimonga cici?” Kaneko ŵasalile kuti, “Ni yele yiyalembekwe, kuti Klistu aŵajilwe kuyiwona yipwetesi ni kwimuka ku ŵawe pa lyuŵa lyatatu.”—Luka 24:38, 46.

Kwa masiku 40 Yesu ali ajimwice, jwalakwe ŵawonecele kwa ŵakulijiganya ŵakwe ndaŵi syakulekanganalekangana. Ndaŵi jine, ŵawonecele kwa ŵandu ŵakupunda 500! Komboleka kuti pandaŵi jeleji ni paŵapele masengo gakusosekwa mnope gakuti: “Jawulagani, mkajiganye ŵandu ŵangosyo syosope, . . . ni kwajiganya kuti asunje yosope yele yinamlamulile. nipo mkumbucileje kuti ndili nomwe moŵa gosope, mpaka kumbesi ja cilambo capasi cino.”—Matayo 28:19, 20.

Pandaŵi jakumalisya jiŵasimene ni ŵakulijiganya ŵakwe ŵakulupicika ŵakwana 11, Yesu ŵasalile kuti: “Nambo pakatema katimcipocela macili ga msimu weswela, patigacimyicilila ŵanganyamwe, pele nipo timcindendela umboni . . . mpaka kumbesi kwa cilambo.” (Mase. 1:8) Kaneko Yesu ŵatandite kwela kwinani, ni ŵasisice kwa jemanjajo ni mawunde.

​—Nganiji jityocele pa Matayo caputala 28; Maliko caputala 16; Luka caputala 24; Yohane caputala 20 ni 21; 1 Akolinto 15:5, 6.