Yobu Akwendelecela Kuŵa Jwagoloka

ANA mundu mpaka akombolece kwendelecela kuŵa jwakulupicika pameso pa Mlungu ali asimene ni yipwetesi yekulungwa mnope? Nambi wuli naga kupikanila kwakwe kukuwoneka kuti ngakukumkamucisya kupata cilicose mwakucilu? Yati mpela yeleyi yamtendecele mundu jwine lina lyakwe Yobu, soni yakuyicisya yakwe yawonece.

Ayisalayeli paŵaliji mkutama mu Eguputo, Yobu (Ayubu) juŵaliji jwacinasi jwa Abulahamu ŵatamaga m’cilambo cacikumanyika moŵa agano kuti Arabia. Pandaŵi jeleji malayika kwinani gasongangene pameso pa Mlungu, soni Satana jwakupanduka jula ŵajile kusongana nawo. Pameso pa malayika gagasongene kwinani gala, Yehofa ŵaŵecete yakulosya kuti akusamkulupilila ndumetume jwakwe jwakulupicika Yobu. Soni mpaka Yehofa ŵaŵecete kuti kwaliji kwangali mundu jwine jwalijose juŵaliji jwagoloka mpela Yobu. Nambo Satana ŵaŵecete kuti Yobu ŵatumicilaga Mlungu ligongo lyakuti Mlungujo ŵampele upile, soni ŵamkamucisyaga. Satana ŵaŵecetesoni kuti naga Yobu ali amsumwile yosope yakwete, mpaka akombolece kumnyosya Mlungu.

Mlungu ŵamkundile Satana kuti ajonanje cipanje ca Yobu, kaneko ŵanace ŵakwe, soni kaneko ŵamlwasisye. Ligongo lyangamanyilila kuti Satana ni juŵatendekasyaga yosopeyi, Yobu nganapikanicisyaga ligongo lyakwe Mlungu ŵakundile kuti jwalakwe asimane ni yipwetesiyi. Nambope Yobu nganamleka Mlungu.

Ŵandu ŵatatu ŵaŵaga mpela ali acimjakwe ŵasyesyene ŵa Yobu ŵayice kwa jwalakwe. Jemanjaji ŵaŵecete maloŵe gejinji gagakusimanikwa m’buku ja Yobu. Ŵanduŵa ŵalingaga kumsimicisya Yobu kuti Mlungu ŵampaga cilango ligongo lya yakulemwa yakwe yakusisika yiŵatesile. Mpaka ŵayice pakuŵeceta kuti Mlungu ngakusiŵanonyela ŵakutumicila ŵakwe, soni ŵangakulupilila. Yobu ŵakanile nganisyo syawo syakulemwecekasyo. Mwakulimba mtima, Yobu ŵaŵecete kuti jwalakwe ngaleka kuŵa jwagoloka mpaka ciwa!

Nambo ciŵalemwisye Yobu ni cakuti ŵaliwonaga kuŵa jwakulungama mnope. Mundu jwine jwacinandipile pa wosopewo lina lyakwe Elihu, juŵapikanilaga kuŵecetana kwawo kosope, ŵaŵecetepo pakusaka kwajamuka. Elihu ŵamjamwice Yobu ligongo lyakuti nganakuwonaga kulosya kuŵajilwa kwa ulamusi wekulungwa wa Yehofa Mlungu kuŵa kwakusosekwa mnope kupunda kulosya kulungamika kwa mundu. Elihu ŵajamwicesoni mwamacili acimjakwe ŵa Yobu ŵala.

Kaneko Yehofa ŵaŵecete najo Yobu ni kumjongolela kaganisye kakwe. Mwakumtagulila ya yakupanganganyikwa yejinji yakusimonjesya, Yehofa ŵamjiganyisye Yobu kuti mundu ali jwamnandi mnope pakuwanicisya ni ucimbicimbi wa Mlungu. Yobu mwakulinandiya ŵapikanile kumnjongolela kwa Mlungu. Yehofa pakuŵa ali ‘jwacinonyelo cacikulungwa ni jwacanasa,’ ŵamposisye Yobu ulwele wakwe, ŵampele cipanje cakwe kuwilisya kaŵili, soni ŵampele upile wakola ŵanace likumi. (Yakobo 5:11) Ligongo lyakuti Yobu ŵajendelecele kuŵa jwagoloka pameso pa Yehofa atamose kuti ŵasimene ni yipwetesi yekulungwa mnope, jwalakweju ŵapakombwele kusisya unami wa Satana wakuti ŵandu ngaŵa mkwendelecela kuŵa ŵakulupicika pameso pa Mlungu naga akusimana ni yipwetesi.

​—Nganiji jityocele m’buku ja Yobu.